Erik Jensen: Naak nunatta karsia aningaasaqarnerlioraluartoq – aningaasat atornissaat eqqortuuvoq

Erik Jensenip nunatta karsiata sinneqartooruteqarneranit innuttaasut iluanaaruteqassasut oqaatigaa. Aningaasaqarnermut Siunnersuisoqatigiit sipaartoqarsimannginneranik isornartorsiuipput.

Allattoq Markus Valentin

juulip 27-at 2025 10:00

Aningaasanut inatsit siorna suliarineqalermat IA-p Siumullu aningaasarpassuarnik atuinerat Aningaasaqarnermut Siunnersuisoqatigiit isornartorsiorpaa.

Naalli aningaasanut inatsimmi missinngersuutinut inatsimmi malittarisassat malinneqaraluartut politikerit aningaasartuutinut atatillugu killissaat tikiivillugu iliuuseqarput – nunatta karsialu maanna amigartooruteqalerpoq.

Politikerit nunatsinni aningaasarlioqqittoqarnissaanut sipaagaqarlutillu sipaarniarsimasariaqaraluartut, Aningaasaqarnermut Siunnersuisoqatigiit isumaqarput.

Taamaattumik nunap karsia amigartooruteqarpoq

Nunatta karsiata amigartooruteqarnera siorna NunaGreenimut 400 millionit koruuninik aningaasaliisoqarsimaneranik Greenland Airportsimullu 100 millioninik tunniussisoqarneranik pissuteqarnerarlugu Naalakkersuisut namminneerlutik nassuiaatigaat.

Aalisarnermi 2023-mi rekordiliisoqarpoq. Raajaqassuserli – kiisalu kiilumut akit – pisassiissutillu apparput.

Tamatuma saniatigut sanaartornerup annikilliartornera pissutigalugu aningaasaqarneq siuariartornikinneruvoq. Tamanna ilaatigut Nuummi mittarfiup nutaap sanaartorneqarnerani sanaartukkat annertuup naammassinerannik pissuteqarpoq.

Peqqinnissamut naalakkersuisoqarfiup ukioq manna aningaasartuutai 2025-mi missingersuutigineqaqqaartunut sanilliullugit 65 millionit koruuninik qaffapput. Saniatigullu soraarnerussutisiaqartunut 59 millionit koruuninik atuisoqarneruvoq.

Namminersorlutik Oqartussat ingerlatseqatigiiffiinit nunatta karsianut 107 millionit koruuninik akiliinikinnerusoqarnissaa aamma naatsorsuutigineqarpoq. Tamanna aalisakkerinerup ineriartorneranik siuariartortoqarnerata apparneranik pissuteqarpoq.

Tamatuma saniatigut Namminersorlutik Oqartussat ingerlatseqatigiiffiutaat ataasiinnarluunniit aningaasaqarnikkut siumut ilimaginngisamik ajortorujussuarmik ingerlappat tamanna nunatta karsianut annertuumik kinguneqarsinnaasoq, ukiut sisamat matuma siorna Naalagaaffiup Aningaaserivissuata siulittuutigaa.

Taamaattumik Naalagaaffiup Aningaaserivissuata aamma Aningaasaqarnermut Siunnersuisoqatigiit aningaasaqarnermut annertuumik aaqqissuusseqqittoqarnissaa innersuussutigaat. Tamatumalu saniatigut naalakkersuisoqatigiissimasut piffissanut ilungersuaffiusunut atorneqartussanut sipaarniaratik aningaasanik amerlavallaartunik atuisimanerarlugit isornartorsiorpaat.

Allisiguk

Erik Jensen (S) piffissami tassani aningaasaqarnermut akileraarutinullu naalakkersuisuuvoq. Taassumalu naalakkersuisuusimasut aningaasanik atuinerat peqqissimissutiginngilaa.

- Naalakkersuisut siuliini aningaasarissaarpugut. Taamaammat aningaasarissaarnerup innuttaasunut iluaqusiinissaa pissusissamisoorpoq.

Aamma atuarukAningaasaqarnermut siunnersuisoqatigiit: Nunatta karsia tatineqartoq politikerillu sipaarnianngitsut

Aningaasaqarnermut Siunnersuisoqatigiilli siulittaasuata, Torben M. Andersenip aningaasartuutit qaffasinnerusut aningaasaqarnermut ajornakusoortitsinera nassuiaatigaa.

- Tassa imaappoq ineriartornermi ajornartorsiutit takkuttut aaqqiivigineqarsinnaanissaannut periarfissaqarpallaarani. Taannalu aqqutissaanani.

Nuuttartut pinngitsoortinniarlugit

Missingersuutinut inatsisip killinga tikinneqartariaqarsimasoq, Erik Jensenip KNR-imut nassuiaatigaa.

Nunatsinnit Danmarkimut nuuttartut amerliartortut KNR-ip siusinnerusukkut nassuiaatigaa. Tamannalu naalakkersuisutut akisussaasuusimasup mumisinniarsimavaa.

- 2023-mi angusarissaarluta 431 millionit koruuninik sinneqartooruteqarpugut. Tamannalu innuttaasunut tunniussaqarfiginiarsimavarput. Taamaammat assigiinngitsunik aaqqiissuteqarpugut, taamaaliornikkut nunatsinni inuuniarneq pilerinarnerullunilu nuuttartut amerliartortut pinaveersaartinneqassallutik, Erik Jensen oqarpoq.

Tamannalu pillugu Aningaasaqarnermut Siunnersuisoqatigiit isornartorsiorpaasi. Sinneqartoorutinik atuinasi aningaasanik illuartitsisimassagaluartusi taakku isumaqarput, taamaalilluni pissutsit maannakkutulli allanngorneranni ajornartoorneq ingasappallaassanngikkaluarluni. Tamanna qanoq isumaqarfigaajuk?

- Apeqqut eqqarsaatiginninnermi isumaliornerlu kingusinnerusukkut takussutissiinerusoq akissuteqarfigisinnaanngilara. Kisianni naalakkersuisuni siuliini aningaasarissaarpugut. Taamaammat aningaasarissaarnerup innuttaasunut iluaqusiinissaa inissaminiippoq.

Piffissat nutaat

Naallu Erik Jensen aamma naalakkersuisoqatigiissimasut sinneqartoorutinit naammattunik illuartitsisimanngikkaluartut taassuma sipaartoqarsimanera nassuiaatigaa.

- Aningaasanik illuartitsivugut, qinersinissallu suaarutigineqarnerata nalaani aamma akiliisinnaassuseqarpugut.

Aningaasaqarnikkulli pissutsit nutaat pissutigalugit naalakkersuisut aningaasartuuteqarnaveersaaqqittariaqartut oqaatigaa.

- Pisassiissutit allat aningaasaqarnikkullu pissutsini allannguutit pissutigalugit qinersisartunut qanoq neriorsuuteqassanerluta eqqarsaatigeqqissaartariaqarparput.

2025-mut aningaasanut inatsit siorna novembarip 22-ani akuerineqarpoq,

KNR-ip Northwest Atlantic Fisheries Organisationimit raajartassiissutinik annikilleeqqusineq oktobarip qulingani allaaserigaa Aningaasanut Inatsit 2025-moortoq siorna novembarip 22-ni akuerineqarpoq

Erik Jensenip naalakkersuisoqatigiit aaqqissuusseqqinnermik suliaqarnerat aamma naalakkersuisut qanoq ilillutik siunissami aningaasaqarnermik qulakkeerinissaat pillugit KNR-imit ilanngutassiap tulliani oqaaseqarnera malinnaaffigiuk.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.