Oqallinnissamut siunnersuut: Inuusuttut inunnut ulorianartumik pinerlunniartarnerat qanoq annikilisassavarput?

Politiit 2024-mut nalunaarusiaat ineriartornermik ernumaammernartumik takutitsivoq. Inuusuttut pinerlunniartarnerat appariartuleraluareerluni annertusiartoqqippoq.

Ernumaammineq Inatsisartunut annguppoq taakkulu ukiaanerani ataatsimiinnerat tallimanngorneq septemberip 19-at aallartissaaq.

Nukappiaraq 14-nik ukiulik 2023-mi Nuummi unatarneqarluni ima ajoqusertigaaq Rigshospitalimut aallarunneqartariaqarluni.

Taannaannaanngilari. Meeraqataasa unataasut pisoq mobiliminnik filmiliaraat.

Taamaattumik Demokraatit sinnerlugit Inatsisartuni ilaasortaq Bo Martinsen apeqquteqaat aallaavigalugu oqallinnissamik siunnersuuteqarpoq inuusuttut pinerlunniartarnerat akimmisinniarlugu. 14-ninillu ukiullip saassunneqarnera sunniivoq.

- Taanna pisoq ajoraluartumik assersuutaannaavoq ineriartornermut ajortup tungaanut ingerlasumut, tamanna inuit toqqissisimanissaannut inuiaqatigiinnilu ataqatigiinnermut akornutaalluni, Bo Martinsen oqallisissianut siunnersuumminut tunngavilersuivoq.

Atuarfik akuliutissaaq

Taanna aamma siunnersuuteqarpoq inuusuttuaqqat kamaammersimanerisa inuusuttuaqqanut allanut tutsinnaversaarnissaa pillugu.

- Atuarfiit sunngiffimmilu sammisassaqartitsiviit siusinaartumik pinaveersaartitsinermi sunniuteqaqataalluinnartuupput. Taamaattumik nukiit annertusartariaqarput isumaqatigiinnginnermi aaqqiissutissanik atuartitsinerup nukittorsarnissaanut, allat misigissusaannik, eqqarsaataannik misigisaannillu paasinnissinnaaneq aammalu digitalimut akisussaassuseqarneq klassini siusinnerni aallartinneqarneqartariaqarmat, Bo Martinsen allappoq.

Meeqqat meeraqatiminnik persutaasarnerat politiit 2024-mut ukiumoortumik nalunaarutaanni allassimavoq. Meeqqat persuttarneqartut 170-it 2024-mi nalunaarutigineqarput.

- Suliat soorlu Nuummi nukappiaqqamik 14-inik ukiulimmik saassussisoqarnerani persuttaanerup filmiliarineqarlunilu qarasaasiakkut siammarterneqarneratut ittut eqqarsaatigalugit, inuusuttut digital aqqutigalugu assigiinngitsutigut pinerluuteqartarnerat suunngitsuinnaanngitsutut isiginiarneqartariaqarpagut, Bo Martinsen oqarpoq.

- Inuit naapittarfiisigut persuttaanermut tunngasunik avitseqateqartarneq aliikkutassiaralugillu ingerlaartitsisarnerit pillugit toraagalimmik suliniutit aallartinneqartariaqarput, tassunga ilanngullugit paasisitsiniaanerit malittarisassanillu sukaterinerit, taanna oqarpoq.

Apeqquteqaat aallaavigalugu oqallinnissamik Bo Martinsenip siunnersuutaa novemberip arfernat oqaluuserineqassasoq siunnersuutaavoq.