Meeqqat illersuisuat: Meeqqanut persuttaasoqartarnera ernumanartumik takussaaleraluttuinnarpoq

Uppiseriarlugu minnerpaamik 15-eriarlutik isimmittarlugu. Tassa Nuummi nukappiaraq 14-inik ukiullip sapaatit akunnerata ataatsip affaatalu qaangiummata peqatiminnit ataatsimoortunit aqqusinermi misigisaa.

Pisumi ilungersunartumi suliat pisut assingusut arlaqartut, meeqqat illersuisuat, Aviâja Egede Lynge oqarpoq.     

- Piffissaq kingulleq ingammik, meeqqat meeraqatiminnik sakkortoorujussuarmik pissusilersortut. Tassa timikkut tarnikkullu persuttaaneq, ajoraluartumik meeraqatiminnut atoraat ernumassutigineqarluni saaffiginnissutaasarpoq. Taakku saniatigut aamma uagut nammineq malinnaanertigut takuneqarsinnaalluni.

Meeqqat illersuisuat, Aviâja Egede Lynge oqarpoq. Taassuma oqarnera naapertorlugu, meeqqat arlaqartut saassunneqarsimallutik saaffiginnittartut amerliartorput.

Persuttaaneq filmiliarineqartoq

Nalinginnaaleraluttuinnartoq taanna Kalaallit Nunaanni Politiit uppernarsarpaat.

- Inuusuttut akornanni sakkortuumik persuttaasarnerit amerliartortut nalaattalerpagut. Inuusuttut filmiliorlutillu videoliaminnik inoqatinut attaveqaatinik siammarterisarnerat takussaavoq. Tamatuma saniatigut perluuteqarfigineqartunut persuttaanerit aamma inerteqqutaasumik pillaassutaasinnaasumillu siammarterneqarnerat iluanngilaq, Kalaallit Nunaanni Politiit pinaveersaartitsinermut misissuinermullu pisortaat, Mikkel Høj Svendsen oqarpoq.

Politiit kalaallit atuarfeqarfiinut sammisumik ilaatigut inoqatinut attaveqaatinik atuinermik sammisaqartunik pinaveersaartitsinermik suliniuteqartut taassuma paasissutissiissutigaa.

- Tamatuma saniatigut Kalaallit Nunaanni politiinit meeqqat atuarfiini angajulliit persuttaanermik pinaveersaartitsinermik suliaqartinneqarnissaat "TASSA!"-mik taaguuteqartoq taperserparput. Suliniut Kalaallit Meeqqat aamma PiSiu suleqatigalugit ineriartortinneqarpoq, Mikkel Høj Svendsen oqarpoq.

Angajoqqaat ernumasut

Angajoqqaat ilaat aamma politikeriusoq Siumumeersoq, Doris J. Jensen ernumasunut aamma ilaavoq. Taassuma aaqqissuussaanik Nuummi unnugu innuttaasunut oqallititsineq ingerlanneqassaaq.

- Nammineerlunga anaanaavunga, uigalu katillugit tallimanik qitornaqarpugut. Aammalu innuttaaqataalluni Nuummi massakkut taamatut inissisimasoqartoq toqqisisimanngitsorujussuuvoq. Taamaammat pisortat utaqqiinnarnagit uagut innuttaaqataasutut qanoq iliuuseqarsinnaanerput pingaarnerpaatigut unnugu aggersaavunga.

Illoqarfimmi ajornartorsiutit aaqqinniarlugit oqallitsitsineq aallarniutaasinnaasoq Doris J. Jensen isumaqarpoq.

- Qiterpiaa tassaavoq, uagut innuttaaqataasugut qanoq iliuuseqarsinnaanerput. Periarfissaq arlaqarput, aamma kaammattuisinnaavugut. Assersuutigiinnarlugu kommuni ullumikkut miljøarbejdereqarpoq, taakku ullukkut sulisarput meeqqanut nakkutiginnillutik, aamma kommuni taakku sulisui amerlineqarsinnaapput, unnukkullu nakkutiginninnerit ingerlanneqartalerlutik. Kisianni aamma inuit namminneq uagut piumassutsimik ikiuukkusuttut unnuarissanut (natteravninut) nalunaarsinnaavugut.

Ikioqqullutik nilliaateqartut

Ajornartorsiut taanna ilungersunartutut meeqqat illersuisuata isigivaa.

- Oqaatigisinnaavara tassa ataasiinnaanngillat, uani annertuumik eqqartorneqarpoq inuiaqatigiinni maannakkut pisoq. Angajoqqaat ataasiakkaat uani taamaallaat pineqanngillat, uani angajoqqaarpassuit ernumapput.

Ajornartorsiut qaangerneqassappat suliniutit pimoorunneqarnissaat pingaaruteqarluinnartoq, Aviâja Egede Lynge oqarpoq.

- Pisoqartillugu peqqutit assigiinngitsorpassuusinnaapput. Kisianni qisuariaatinni uani pingaartillugu aallaavigisimavara, meeqqat taamatut pissusilersortut aamma meeraasarmata allatigut ikioqqullutik nilliaateqartut.