Raajaqassuseq suli appariartorpoq: Arlalinnik naleqqussaanissaq pisariaqarsinnaasoq
Nunatsinni raajat ikiliartuinnaavipput.
Raajaqarnerup piujuartinneqarnissaanut tunngatillugu raajartarineqartut qanoq amerlatiginissaannut ukiumoortumik innersuussuteqartartumit, Northwest Atlantic Fisheries Organisationimit Nafo-mit nalunaarusiap nutaap tamanna takutippaa.
Nunatta kitaani tunumilu raajat 80.000 tonsit aamma 1.000 tonsit aappaagu pisarineqarsinnaanissaat Nafo-p innersuussutigaa.
Tassa aalisartut nunatta kitaata sineriaani raajartarisaat siornamit 22.500 tonsinik ikinnerunissaat tunullu sineriaani 5.100 tonsinik ikinnerunissaat innersuussutigaa.
Naleqqussaaneruneq
Ann Dorthe Burmeister Pinngortitaleriffimmi siunnersuisuunerullunilu ilisimatusartuuvoq. Taassuma raajaqassutsip appariartornera aalisapilunnermik pissuteqaannannginnerarpaa, tamannali saarulliit raajanik nerisaqartartut amerlinerannik aamma pissuteqarnerarlugu.
Nafo-p taakku marluk pissutigalugit 2025-mi pisassiissutissat 2024-mit appasinnerunissaat innersuussutigaa.
Nunatta kitaani raajaqassuseq Nafo-p annertussutsimut pitsaanerpaatut taasartagaata suli nalaaniippoq. Tunumili raajaqassuseq piujuartitsisumik raajarniarnermut killissamit 42 procentimik appasinnerulluni.
Tamannalu pissutigalugu naleqqussaaneq misissorneqarnerussasoq, Ann Dorte Burmeister oqarpoq.
- Annertussutsimut pitsaanerpaap missaanniikkaanni uumasoqassuseq suli pitsaasumiittarpoq. Ataaniikkaannili naleqqussaanerit atulersinneqassanersut eqqarsaatigineqassaaq, taamaalilluni ikilinerunnginnissaat qulakkeerneqassalluni.
Nunatta kitaani raajaqassuseq aatsaat siullermeertumik apparanilu piujuartitsinissamut killiliussamiinngilaq.
- Raajaqassuseq 2014-imi appariartornikuuvoq, 2016-imilu qaffakkiartoqqilluni, Ann Dorte Burmeister oqarpoq.
Aalisarnermut inatsit nutaaq
Raajat piujuartitsisumik pisarineqartartunit amerlanerusut pisarineqarnerat iluanaaruteqarnsisamut suliffissaqartitsinissamillu ilaatigut pissuteqarpoq. Aamma raajartassiissutissat qanoq innissaat politikerit naggataani aalajangertarpaat.
Aalisarnermut inatsit nutaaq aappaagu atuutilerpat aalisarneq piujuartitsisumik killiliussamut naleqqussarneqartariaqarsinnaavoq.
Taamaammat Nafo-p 2025-mut raajartarineqartussanut innersuussutai aalisartunut minnerusunut qanoq kinguneqarsinnaanerat suli nalunarpoq.
