Aalisarnermut inatsit ukiuni 20-ni assortuussutaareersoq aamma ataatsimiititalianit ataatsimiititaliarsuarniillu kisissaanngitsunik innersuussuteqartoqareersorlu aalisarnermut inatsit nutaaq kiisami akuerineqarpoq. Aalisarnermut inatsit kingulleq pisoqalisimasoq 90-ikkut qiteqqunneranneerpoq.

Taamaammat nutaamik inatsiseqalernissaq piffissanngortoq kikkut tamarmik isumaqarput.

Imarisassaali isumaqatigiinngissutaangaatsiarpoq. Ippassarlu Inatsisartuni akunnerit arfineq-pingasut oqaluuserinnittoqareersorlu - kiisami – akuerineqarpoq.

Aalisarnermut piniarnermullu naalakkersuisup, Kim Kielsenip (Siumut) oqarnera naapertorlugu naak nunatsinni inuussutissarsiutip annerpaartaa pillugu pappiaqqatigut annertuumik allanngortoqaraluartoq inatsisip atuutilernissaanut aqqummi allorialaaginnartoqarpoq.

- Suliaq naammassivoq uani inersuarmi. Taamaattorli aatsaat oqarpunga, atsipaakka kangujarterlugit aatsaat aallartittariaqarpakka, taanna KNR-imut oqarpoq, nangillunilu:

- Nalunaarutit allallu suliarineqalertussaassapput. Pisortaqarfimmi taakku sulisut ulapputtussaassapput. Maannakkut januaarip aallaqqaataani 2025-mi atuutilertussami, maannakkut nalunaarutit atuuttut nutarterneqassagamik.

Nunarput tamarmi tusarneqartoq

Aalisarnermut inatsit upernaakkut ataatsimiinnermi oqallisigineqartuni annerpaavoq. Akunnerpassuit oqallittoqarpoq uteqqiisoqaqqaarpoq, illuatungiliuttunillu tatiginnikkunnaarnermik marloriarluni siunnersuuteqartoqarluni.

Inatsisartut inatsit ippassaq taasissutigalugulu akuersissutigaat. Tamatumali pinnginnerani nunatsinni illoqarfinni nunaqarfinnilu arlalinni akerliussutsimik takutitsisoqarpoq. Tusarniaanermi akissutit 36-upput, inoqutinullu attaveqaqatigiittarfitsigut naammagisimaarinninnginnermik allakkat arlaqarlutik. Maniitsumilu aalisartut puigussanngilagut, taakku inatsisissatut siunnersuut januaarimi ikuallappaat.

Taamaakkaluartorli Kim Kielsenip naammagisimaarinninngitsut tamaasa tusarnaarsimavai, taakkulu oqariartuutaat inatsimmut naammassineqartumut sunniuteqarput.

- Siunnersuuteqarnerup kingunerisaanik tusarniaanernik akissuterpassuit pissarsiarineqarnikuupput, taakkualu tamaviisa aamma atuarneqarnikuullutik aamma akissuteqarfigineqarnikuullutik. Siunnersuutip siullermeerneqarneraninngaanniit, tassa tusarniaassutigineqarneraninngaanniit taavalu maannamut tassa immaqa 20-nit 25-t tungaanut allannguuteqarsimavoq, Kim Kielsen oqarpoq.

Kim Kielsenillu nunatsinni inuussutissarsiutit annersaanut atatillugu kisimi suliaqarsimanani erseqqissassallugu aamma pingaartippaa:

- 13-eriarluni allanngortinneqarnikuuvoq. Suliassaq tassa suliarineqarpoq, aamma naalakkersuisut uanga siulima assigiinngitsut suliaq aallartisartarsimavaat, ataatsimiititaliarsuit marluk pilersinneqarnikuupput, qulaajagassat assigiinngitsut qulaajarneqarsimapput. Taamaammat paasissutissarpassuit pigineqarsimapput, inatsisimik siunnersuusiornissatsinnut, taanna oqarpoq.