- Nammineq naalakkersuisoqarfiata inatsisissamut oqaaseqaataani allassimapput. 

Aalisarnermut inatsisissap nutaap suliffissaaleqinermik kinguneqarsinnaaneranut Kim Kielsenip iluummuunnginneraaneranut, taama naatsigisumik ersaritsigisumillu inuiaqatigiilerinermik ilisimatusartoq Birger Poppel oqaasissaqarpoq. 

Inatsisissaq tusaamasaallunilu tusaamanerlugaasoq Inatsisartut upernaakkut ataatsimiinnerani sapaatit akunneri pingasut qaangiuppata suliarineqassaaq. Upernaakkut ataatsimiinnerup aallartinnissaanut sapaatit akunneri marluinnanngorput, aallartinneraniillu ullut sisamat qaangiuppata aalisarnermut inatsisissaq siullermeerneqassaaq. 

Tamannali pitinnagu pisussaq alla pingaarutilik ullumi pissaaq, tassa inatsisissatut siunnersuut tamakkiisoq ullumikkut tunniunneqartussaavoq.

Ernumassutit isornartorsiutillu ilanngunneqarsimanersut qanorlu ilanngunneqarsimanersut,  takussallugu pissanganarpoq, Birger Poppel oqarpoq. 

Taanna ilisimatusartut allat tallimat peqatigalugit akissuteqaammik ernumassutinik isornartorsiutinillu imalimmik Aalisarnermut Piniarnermullu Naalakkersuisoqarfimmut anngussaqarpoq. 

Sinerissap qanittuani aalisartunut nammineq pigisassanik pisassiisalernissaq (IOK) ilaatigut aalisarnermut inatsisissami siunertarineqarpoq, tamannalu siunissami ungasinnerusumi sinerissap qanittuani aalisartut affaannanngorsinnaaneranik kinguneqarsinnaavoq. 

- Aningaasaatilissuit, aningaasanillu allanik aallerfissaqariaannaat kisimik aalisarnermik ingerlatsilernissaat inatsisissatut siunnersuummi erserpoq, Aalborg Universitetiani Pilersaarusiornermut Piujuaannartitsinermullu lektori, Rikke Becker Jacobsen, akissuteqaqataasoq taama oqarpoq.

Isornartorsiuinerup kingorna Aalisarnermut Piniarnermullu Naalakkersuisoq Kim Kielsen (Siumut) tusagassiortunik katersortitsinermini isornartorsiuinermut akerliliivoq, isornartorsiuinerlu paatsiveerussaarutaanerarlugu:  

- Ilisimatuut qanorluunniit oqalutsigigaluarpata aamma uagut piniartutut aalisartutut ataasiakkaat nalunngilarput inuussutissarsiuterput akiginavianngilarput, Kim Kielsen januaarimi taama oqarpoq.

- Taamaattut paatsiveerussaanerit allatigullu tulluanngitsutut isigaakka. Taama ersaritsigisumik oqassuunga. Uani pingaartupilussuugami aalisartoq kinaluunniit aalisarnermut inatsisissami toqqissilluni – pisinnaatitaaffini pisussaaffinilu – aamma tassa takusinnaassagai. Uagut naalakkersuisooqatigiinni aalisartunik nungusaanianngilagut, taanna oqarpoq.

Taama pisoqarneraniilli sapaatit akunneri arfineq-marluk ingerlasimalerput. Kim Kielsenillu isornartorsiuinera KNR-imit tusagassiorfinnillu allanik malersorneqaqqinngimmat Birger Poppel pakatsivoq. 

Naalakkersuisulli nammineerlutik inatsisissamut oqaaseqaataani qupperneq 33-mut qupperaanni, siunnersuut sulisoqarnikkut ukioq naallugu sulisut 480-it missaannut naapertuuttumik ikilinerinik kinguneqassasoq allassimavoq. 

- Naatsumik oqaatigalugu Kim Kielsenip Naalakkersuisut sinnerlugit nassiussaanni, patsiveerussaarisoqannginneranik takussutissaqarpoq. Sulisinnaasullu ikileriarnissaannut aamma takussutissaavoq, Birger Poppel oqarpoq nangillunilu: 

- Tassa suliffissaaleqisoqalissaaq, inuuniumminnik annaasaqartoqassaaq. 

Suli ernumavoq

Kim Kielsenip ilisimatuut paatsiveerussaarineraraluarai, nammineerluni oqaasii oqaaseqaammut naapertuussorinanngillat. 

- Aap, naapertuutinngillat. Imaassinnaagaluarpormi Kim Kielsenip taama pisoqarnissaa inuttut nammineq ilimaginngikkaa, kisianni taama pisoqarumaarpoq, Birger Poppel oqarpoq. 

Aalisarnermulli inatsisissap IOK-llu atuutilernissaasa, annermik umiatsiaararsortunut illoqarfinnut inukinnerusunut allanullu annertuumik kingunipiloqarnissaannik ernumanini, Birger Poppel allanngortinngilaa. 

Allatut iliorneq tinnaajusattuliornerussaaq, taanna uparuaavoq.

- Ilisimartusartoqatigiit misissueqqissaarnerat inatsisissatut siunnersuummut oqaaseqaatit ilarpassuinut ataatsimut isigalugu naapertuuttupilussuuvoq. 

Piffissaq killiliussaq pingaarutilik

Kim Kielsenip aamma Aalisarnermut Piniarnermullu Naalakkersuisoqarfiup aalisarnermut inatsisissatut siunnersuut nutaaq naammassisaq tunniuppassuk, qanoq imaqarumaarnera nalunarpoq. 

- Avannaani qularnartut suuneri imaluunniit aalisariutilissuit kingunipiluusinnaasunut ernumassutaat Aalisarnermut inatsisissamut tunngasut ilisimanngilagut. Taamaammat pissanganartupilorujussuuvoq, Birger Poppel oqarpoq. 

Aalisarnermut inatsisissap ukioq manna naammassineqarnissaanut allat eqqoriaanissaat, Birger Poppelip tulluarnerutipaa. 
Pisulli annertusinnaapput. 

- Nalunngilarput upernaakkut ataatsimiinnerup nalaani qinersinissaq suaarutigineqaarumaartoq, taammaattoqarpallu aalisarnermut inatsit ajalusooqqissaaq aallaqqaataaniillu aallartinneqaqqilluni, taanna oqarpoq. 

Kim Kielsen aamma Aalisarnermut Piniarnermullu Naalakkersuisoqarfik KNR-imiit attavigaagut, taakkuli suli uterfiginngilaatigut.