Aalisarnermut inatsit utaqqineqartuartut ajornartorsiutaanera qassiiliutaaqqittoq. Aalisarnermut inatsit ukiuni 20-ni suliarineqarpoq - maannalu piareernissaa tuaviuunneqarpasilerluni.

Inatsisissatut siunnersuut novembarip 29-ani tusarniaassutigineqarpoq. Tamanut tusarniaaneq sapaatinik akunnernik arfineq-pingasunik sivisussuseqarpoq, tamannalu pissutigalugu oqaaseqaatit kingulliit Aalisarnermut Naalakkersuisoqarfimmut januaarip 24-ani tassa pingasunngorpat nassiunneqareersimassallutik.

Tamatuma kingorna Inatsisartuni qinikkat upernaakkut ataatsimiinneq marsimi aallartippat tamanna oqaluuserissavaat.

Sapaatilli akunneri arfineq pingasut naammanngitsoq, Nuummi aalisartut piniartullu peqatigiiffianni, NAPP-mi siulittaasoq, Niels Eli Boassen isumaqarpoq.

- Tusarniaaneq qaammatinik marluinnarnik sivisussuseqarpoq, nalliuttullu nalaanniillunilu. Nalliuttut pingaarutilittut isigisarigut, taanna oqarpoq.

Avannaata Kommuniani borgmesteri, Palle Jerimiassen isumaqataavoq. Kommunimi aalisartullu juullikkunni aamma sulinngiffeqarnikuupput.

- Taamaattumik tamanna kunngit pingasut kingornani isumaginissaanut aatsaat periarfissaqarluni, Palle Jerimiassen oqarpoq.

Inatsisissatut siunnersuut 22-nik qupperneqarpoq. Tamatuma saniatigut nassuiaatit 119-inik qupperneqarlutik.

- Uani inatsisissaq paragrafitai amerlanngillat kisianni tunuatungaaniikkamik suliassartai oqaaseqaatit sukumiisumik nassuiaatitai. Taakkualu tamakkerniaraanni piffissaq annertooq atortariaqarpoq, Palle Jerimiassen oqarpoq.

Nuummi Siumut unnugu ammasumik ataatsimiitsitsissasoq

Nuummi peqatigiiffimmi ulluni marlunni tusarniaassummut akissutissaq suliarineqarpoq. Kisianni:

- Pisariuvoq, aammalu soorlulusooq pisariaqartinneqartoq suli piffissamik annertunerusumik atuisoqartariaqartoq,siulittaasoq, Niels Eli Boassen oqarpoq.

Inatsisissatut siunnersuutip ilaa nalunakujullunilu paatsoorneqarsinnaasoq, taanna isumaqarpoq.

Palle Jerimiassenip, aalisartut, Avannaata Kommunianilu aalisarnermut inuussutissarsiornermullu ataatsimiititaliap tusarniaaneq kinguartitikkusuppaat.

- Tassa suliassap pitsaanerusumik aammalu ingerlanneqarnissaa uani kissaatigaarput tusaaneqarusulluta aammalu suliassap iserfigilluarnissaanut piffissamik tunineqarusulluta, borgmesteri oqarpoq.

Kinguartinneqarsinnaanngilarli. Aalisarnermummi piniarnermullu naalakkersuisup, Kim Kielsenip (Siumut) tusarniaanermut killissarititaasoq januaarip 24-at attatiinnarniarpaa.

Aalisartut saarulliit akigissaarnerulernissaat pillugu upernaaq akerliussutsimik takutitsipput. Assi © : Carsten Faurschou/ KNR

Tamannalu illoqarfiit pingaarnersaani Siumup immikkoortortaqarfianit ilorrisimaarutigineqanngilaq. Nuummi Siumut inatsissatut siunnersuutip atuarnissaanut paasiniarnissaanullu aamma piffissaqarnerorusuppoq. Taakku kulturip illorsuani Katuami unnugu nalunaaqutaq arfineq-marlunut ammasumik ataatsimiititsissapput.

- Naalakkersuisoqatigiinnut, susassaqartunut, minnerunngitsumillu Siumumi politikkikkut aalajangiisartunut qisuariaatit pingaartut pisortatigoortumik toqqaannartumillu ingerlateqqissinnaaniarlugit, qaaqqusissummi allassimavoq.

Aalisarnermut naalakkersuisut assigiinngitsut 13-it

Aalisarnermut inatsisip nutaap assigiinngitsorpassuit oqimaaqatigiissassavai. Assersuutigalugu sinerissap qanittuani avataanilu aalisarnermi. Suliffissuaqarnerup imaanilu avatangiisit akornanni. Aamma nunatta aningaasaqarnerata aamma sumiiffiit aningaasaqarnerata akornanni.

Aalisarnermut inatsit maanna atuuttoq 1996-imeersuuvoq, atulermalli ilassutitut aalajangiinerit allannguutillu arlallit kingorna suliarineqartarsimapput. Aalisarnermut inatsit nutaassaq naammassiniarlugu ulapputigineqartaraluarpoq, inatsisissatulli siunnersuutissat kingusinaarunneqartarput kinguartivinneqarlutilluunniit.

Aalisarnermut inatsit nutaaq ukiunut tusindilikkuutaanut nutaanut ikaarsaarattali ujartorneqalerpoq. 2000-ikkut aallartilaartulli aalisarnermut ataatsimiititaliaq, isumaliutissiissummik suliaqartussaq, pilersinneqarpoq. Isumaliutissiissut taanna inassutinik arlalinnik imaqartoq 2009-mi saqqummiunneqartoq aalisarnermut inatsisissamut tunngaviusussaagaluarpoq, kisianni taama pisoqanngilaq.

Naalakkersuisut aalisarnermut ataatsimiititaliamik allamik 2019-mi pilersitsipput, ilaatigut nunatsinni aalisartut piniartullu kattuffisa KNAPK-p aamma SQAPK-ip, sulinermik inuussutissarsiuteqartut kattuffiata SIK-p aamma nunatsinni sulisitsisut (Grønlands Erhverv). Aalisarnermut ataatsimiititaliaq ukiuni marlunni sulereerluni 2021-mi inatsisissamut atatillugu inassutinik arlalinnik saqqummiussivoq.

Aalisarnermut inatsisissap suliarinerata qanoq ajornakusoortigisimanerata ersiutaasa ilagaat, politikerit aalisarnermut piniarnermullu naalakkersuisutut atorfeqartitaasimasut amerlassusaat. Namminersorneq eqqunneqarmalli naalakkersuisoq 13-eriarluni taarserneqarsimavoq.

Inatsisartunut kingullermik qinersisoqarmalli maanna pingajussaa aalisarnermut piniarnermullu naalakkersuisumik ivertitsisoqarpoq.