Aalisarneq pillugu inatsisissatut siunnersuut nutaaq ukiut 30-t missaani utaqqisaareerluni, inuiaqatigiinni oqallissutaasimareeqaluni piareerpoq.

Tusarniaassutigineqarneranut piffissarititaq sivikigalugu borgmesterit arlallit nunatta avannaaneersut kujataaneersullu sivitsueqqusigaluarput, allaammi aalisartut ilaat aalisarnermut inatsisissatut siunnersuut atorsinnaannginnerarlugu ikuallappaat. Aalisarnermillu ilisimatusarsimasut arfinillit uparuaasunut maanna ilanngupput oqarlutik, siunnersuut atorsinnaanani igiinnaraanni pitsaanerusoq.

Uparuaasut ilagaat Birger Poppel, inuiaqatigiit pissusaannik Ilisimatusarfimmi atorfilik. Aalisarnermut inatsisissaq maannakkutut isikkoqarluni akuerineqassaguni inuiaqatigiinnut kingunerluuteqarusussuarsinnaasoq oqaatigaa:

- Ajunaarnersuartut sunniuteqassaaq. Tamat oqartussaaqataanerat innarlerneqarujussuassaaq. Pingaartumik inatsit taamaatsillugu inuiaqatigiit peqataatillugit oqallisigineqartissimanngikkaanni, Birger Poppel oqarpoq.

Aalisartutut inuussutissarsiortut tamarmik immikkut pisassinneqartalernissaat atuutilissappat umiatsiaararsortut minnernik angallatillit eqqugaanerpaassapput. Pisassinneqarsinnaassanngillammi.

Inatsit eqqarsaatigilluagaanngitsoq

Aalisarnermut naalakkersuisup Kim Kielsenip atorfilittaasalu aalisarnermik inuussutissarsiuteqartut tamaasa eqqarsaatigisimanngikka Birger Poppel isumaqarpoq. Taamaammat siunnersuut suliaripalaagaanerarpaa:

- Aalisarneq pillugu inatsisissatut siunnersuut eqqarsaatigilluarneqarsimanngilaq. Avannaani umiatsiaararsortunut ilaqutaannullu kingunerisassat erseqqissumik eqqaaneqarsimanngillat. Umiatsiaararsortummi ikileriarujussuassapput, tamannalu kinguneqarnerlorujussuarsinnaavoq.

KNR-ip ilisimatusartut arfinillit tusarniaanermut akissuteqaammik atsioqataasut ilaat attaviginikuuaa.

Rikke Becker Jacobsenip, Pilersaarusiornermut Piujuaannartitsinerlugu pillugu Aalborg Universitetiani lektoriusup, umiatsiaararsortutut inuussutissarsiuteqartut affaannanngornissaat nalilerpaa.Tamanna ilumuussappat,aalisartut 400-t aalisartutut inuussutissarsiorsinnaajunnaassapput.

- Aningaasaatilissuit, aningaasanillu allanik aallerfissaqariaannaat kisimik aalisarnermik ingerlatsilernissaat inatsisissatut siunnersuummi erserpoq, taanna taama oqarpoq.

Inuiaqatigiinni tamanut kinguneqarnerlussaaq

Aalisartunut ataasiakkaanut ilaqutaannullu kinguneqarnerluinnassanngilaq – inuiaqatigiilli tamarmik eqqugaassapput, Birger Poppel naliliivoq:

- Aalisarneq pillugu inatsisissatut siunnersuut – qanorluunniit isikkoqaraluaruni – aalisarnerup siunissaa piinnarnagu, Kalaallit Nunaatali siunissaanut kalluaasussaavoq. Pingaartumik aamma maani nunami najugaqariaaseq eqqarsaatigalugu, Birger Poppel oqarpoq.

Umiatsiaararsortut 400-t pisassiissutinik pisisinnaanngippata inuussutissarsiorsinnaajunnaarlutillu, susoqassavamita?

- Inuit taakku nunartik qimattariaqassagunikku sumut taava nuussappat? Inissaqarpat, meeqqerivissaqarpat suliffissaqarpallu? Inuiaqatigiinni naligiinnginneq ingalluni allissaaq, Birger Poppel oqarpoq.

Taamaammat isumaqarluinnarpoq, aalisarneq pillugu inatsisissatut siunnersuut tusarniaassutigineqarnera pinngitsoornani sivitsorneqartariaqartoq, kikkullu tamaasa isumasiortariaqartut. Pingaartumik inatsisip nutaap atuutilerneratigut eqqugaanerpaasussat. Aalisartut aamma taakkuupput aalisarneq pillugu inatsisissap quppernerinik 22-nik, oqaaseqaatillu quppernerinik 149-nik – tusarniaanermut atatillugu piffissarititami quppernermik peqqissaarullugit misissuinissamut akissutissanillu allattuinermut piffissaqarsimanngitsut.

- Sammisaq oqallisigisariaqarpoq, nunaqarfimmiut illoqarfimmiullu aalisarnermut tunngasumik ulluinnaqartut peqataatillugit, Birger Poppel oqarpoq.