Aalisarneq pillugu inatsisissaq: Aalisartut hundredelikkaat allanik suliffissarsiortariaqassasut, lektori siulittuivoq

Aalisarneq pillugu inatsisissatut siunnersuummi niuerutigineqarsinnaasunik nammineq pigisassanik pisassiisalernissaq siunniussaavoq. Tamanna umiatsiarsorluni qaleralinniarnermi aallaqqaammut atuutissaaq kingusinnerusukkullu immaqa aamma allanik aalisarnermi.
Tamanna aalissarneq pillugu inatsisissatut siunnersuummi utaqqisaasimaqisumi uissuumminarnersaasoq, Rikke Becker Jacobsen, Aalborgip Universitetiani pilersaarusiorneq attanneqarsinnaasumillu ingerlatsinermik ilisimatusarnermik ilisimatusarfimmi lektoriusoq, isumaqarpoq.
Sinerissamummi qanittumi aalisartut ikilingaatsiassapput. Allaat affaannit ikinnerulerlutik. Ingerlaannaq taamaalinani, ukiulli ingerlaneranni taamaalisssasoq, taanna naliliivoq.
- Ullumikkut 900-it sinneqalaartunik sinerissamut qanittumi aalisartoqartoq, siunissami tamaani aalisartoqatigiiusussat 40-ssasut siunniussaavoq, Rikke Becker Jacobsen oqarpoq.
Tamanna aalisarneq pillugu inatsisissatut siunnersuummi aalisartut ataasiakkaat annerpaamik aalisagartassat 2,5 procentiannik pisassaqarsinnaanerannik siunnersuuteqarnermik peqquteqarpoq.
Aalisartoqatigeriaatsit assigiinngitsuusinnaasut taanna nassuiaavoq.Ullumi aalisartuusuni amerlanerit annerusunik minnerusunilluunniit angallateeraqarput, marlussunnik sulisoqarlutik. Siunissami aalisartoqatigiilerumaartut angallataat immaqa anginerussapput amerlanerusunillu piginnitseqarlutik.
- Piginneqatigiiffiit arlalinik piginnitseqarsinnaapput, takusinnaasarali naapertorlugu sinerissamut qanittumi aalisarneq allanngorujussuassaaq. Aalisariaaseq allanngorluinnassaaq, ataasiakkaarlutik aalisartut umiatsiarsortullu ikinnerulisssagunarlutik.
Aalisartut pisisinnaassuseqarluartut
Sinerissamut qanittumi aalisartut namminneq pisassaateqalissasut, inatsisissatut sinnersuummi allassimavoq. Tassalu nammineq pigisarilissavaat, aalisartumut allamut tunisinnaallugit. Rikke Becker Jacobsenip oqarnera napertorlugu taamaalippat sinerissamut qanittumi aalisartukinneerarsuanngussaaq.
Taamaammat aalisagartassaateqarnissaq pilerinartuussasoq, aalisagartassanillu pisinissaq soqutigineqassaqisoq,soorluttaaq aalisagartassiissutaatigisat tunillugit akiisa utoqqalinermi sulinnginnersiutiginissaat kajuminnassasoq, Rikke Becker Jacobsen naliliivoq.
Pisassiissutit niuerutigineqarsinnaasut nammineq pigisaqarnerup aamma isumagaa, inuusutttoq aalisartunngorusukkuni, aningaasanik aningaasaerivimmit atukkerneqarluarsinnaasariaqartoq pisisinnaassuseqarluareerluniluunniit, tassalu aningaasaateqarluareerluni.
Ullumikkut aalisarsinnaanermik akuersissummik qinnuteqarsimanissaq piumasaqaatinillu naammassinnisinnaaneq naammapput.
- Aningaasaateqarluartut aningaaserivinnillu atukkerneqarsinnaalluartut kisimik aalisalersinnaassasut maannakkorpiaq siunnersuutaavoq.
Aalisartut piitsut
Nunami sulisussaaleqisoqarmat aalisartut ilaat aalisarunnaassasut, Aalisarneq Pillugu ataatsiititaliarsuup isumaliuutissiissutaani, aalisarneq pillugu inatsisissatut siunnersuummut tunngaviusumi, tunngavilersuutaavoq.
Rikke Becker Jacobsen taama nassuiaavoq:
- Siunnersuut allani, soorlu sanaartornermi, suliffissaqarneranik naatsorsuuteqarnermik tunngaveqarpoq. Uanga takusinnasanni taamaannersoq qularnarpoq. Tamatumunnga inuit perusunnissaat ilinniarsimasuunissaallu pisariaqarpoq.
Aalisarnerup imminut akilersinnaanisssaa, aningaasarsilluaataasarnisaa nunattalu karsianut akileraarutitigut isertitsilluaataanissaa ukkatarineqarsimaqisoq, taanna isumaqarpoq.
Aalisagartassiissutilli ikittuinarnut tunniussuunnerisigut ingammik illoqarfinni mikinerni nunqarfinnilu imminut pilersornermut inuussutissarsiornissamullu periarfissanut ajortumik kinguneqarnissaa inatsisissatut siunnersuummi arajutsisimaneqartoq, Rikke Becker Jacobsen isumaqarpoq.
Aalisarneq pillugu inatsisissatut siunnersuut piviusunngortinneqassanersoq, Inasisartut upernaaaru katersuukkunik isummerfigissavaat.