Aalisarnermut inatsit akunnerit arfineq-pingasungajaat oqaluuserineqareersorlu akuerineqarpoq.

Qulit akerliliipput 21-llu akuersissuteqarlutik. Naalakkersuisoqatigiit amerlassusaattut amerlassuseqartut tassa 21-t akuersissuteqarput, taamaalillunilu ullumikkut taasissutiginnittoqarnerani tupaallannartoqanngilaq.

Inatsisartut ataatsimiittarfianni ullumikkut ataatsimiinnerup annerpaartaa aalisarnermut inatsimmik oqaluuserinninneruvoq. Politikerimmi inatsisissamik taasissuteqarnissaannut ullumikkut killippugut.

Taasissutiginnittoqannginneranili aalisarnermut inatsisissaq oqaluuserineqangaatsiaqqippoq.

Nipituumik oqallittoqarpoq, illuatungiliuttut naalakkersuisullu akornanni isumaqatigiinngittoqarnera pissanganartorsiuffiullunilu illuatungiliuttut partiianit naalakkersuisunut tamanut tatiginnikkunnaarnermik taasinissamik siunnersuuteqartoqarpoq.

Nammineq iluarisamik suliaallunilu tuaviuunneqartoq

Illuatungiliuttut naalakkersuisullu akornanni pasisaattoqarpoq. Illuatungiliuttut naalakkersuisut aalisarnermut inatsimmik upernaakkut ataatsimiinnermi matumani illuatungiliuttut isornartorsiuissutaannik tusarnaarnatik nammineq iluarsisaminnik suliaqarnerarpaat.

- Inatsit suliarilluagaanngilaq, Jens Frederik Nielsen Demokraatineersoq oqaaseqartarfimmit oqarpoq, Aasiannilu raajaleriffiup inatsisip akuerineqarneratigut matunissaa aarlerinartoq innersuussutigalugu.

Naalakkersuisulli tassa IA aamma Siumut eqqissisimalluinnarput. Taakkumi nunatsinni inuttaasunut tamanut pitsaanerpaamik iliuuseqarlutik isumaqaannavipput.

Assi © : Johansinnguaq Olsen/ KNR

Taamaammat Aalisarnermut ataatsimiititaliap siulittaasuata, Kristian Jeremiassenip (IA) taama ajortigisumik pisoqassannginnerarpaa.

Tatiginninnginneq qinersisoqarnissaanillu piumasaqarneq

Illuatungiliuttulli partiivi qularunnaanngillat, Jens Napaattoorlu oqaaseqartarfimmiinnermini naalakkersuisunut tamanut tatiginnikkunnaarnermik taasinissamik siunnersuuteqarpoq.

Taanna Atassummit taperserneqarpoq, Demokraatiniillu Jens Frederik Nielsen suli piumasaqarnerulluni qinersisoqarnissaanik piumasaqarpoq.

- Nunarput nutaanik siuttoqalertariaqarpoq. Naalakkersuisut akornanni aatsaat taama nikerartoqartigivoq, naalakkersuisut maanna taarserneqassapput, taanna oqarpoq.

Illuatungiliuttulli partiivi qularunnaanngillat, Jens Napaattoorlu oqaaseqartarfimmiinnermini naalakkersuisunut tamanut tatiginnikkunnaarnermik taasinissamik siunnersuuteqarpoq.

Taanna Atassummit taperserneqarpoq, Demokraatiniillu Jens Frederik Nielsen suli piumasaqarnerulluni qinersisoqarnissaanik piumasaqarpoq.

- Nunarput nutaanik siuttoqalertariaqarpoq. Naalakkersuisut akornanni aatsaat taama nikerartoqartigivoq, naalakkersuisut maanna taarserneqassapput, taanna oqarpoq.

Tatiginnikkunnaarnermik taasititsineq qinersisoqarnissaalu pinngitsoortinneqarput, naalakkersuisoqatigiimmi tamarmik 21-usut tatiginnikkunnaarnissamut itigartitsillutik imminnut annaapput.

Amerlanerussuteqartut taama amerlatigisut inatsisissatut siunnersuummik aamma akuersipput. Naalakkersuisuisoqatigiit akuersisut illuatungiliuttut tassa Demokraatit, Naleraq Atassullu itigartitsissuteqarput.

Inatsit taamaalilluni akuerineqarpoq, ukiullu 20-t naalakkersuisullu assigiinngitsut aqqanillit suliaqarnerisa kingunerani Kim Kielsen aalisarnermut siuttuunerani taanna akuersissutigineqarpoq.