Milliardilikkuutaat Issittumi illersornissaq pillugu isumaqatigiissummi immikkoortinneqartut

Danmark Issittumi aamma Atlantikup Avannaani taakkualu nalaanni nakkutilliinerulissaaq.

Tamanna Folketingimi amerlanerussuteqartut, naalakkersuisut savalimmiullu naalakkersuisuisa Issittumi illersornissaq pillugu isumaqatigiissutitaavanni pingaarnertut siunniussaavoq.

Isumaqatigiissutitaaq 2033-p tungaanut atuuttussaq Danmarkip illersornissamut ministeriata Troels Lund Poulsenip (V) illersornissamut ministereqarfimmi ataasinngornermi unnukkut saqqummiuppaa.

14,6 milliardit koruunit missaat ilaatigut nakkutilliinermi atugassanik alapernaarsuutinik pingasunik nutaanik umiarsuarsinermut marlunnillu dronesinermut qaammataasallu piginnaasaanik annertusaanermut atugassatut Issittoq pillugu isumaqatigiissutitaami immikkoortinneqarput.

Tassa Danmarkip illersornissaqarfiata umiarsui alapernaarsuutit Thetisitut ittut nungullarsimasuusut tamarmik nutaanik piffissap ingerlanerani taarsersorneqassapput.

Katillugit 11,8 milliardit koruunit sakkutooqarnikkut nukittorsaanermi kisimi atorneqassapput.

Upalungaarsimanermik Kangerlussuarmi ilinniarfik aamma ilinniartoqarsinnaanerulissaaq.

Saniatigut allamik aasartinnagu isumaqatigiissuteqassasut

Nunanut allanut tunngasuni naalakkersuisoq Vivian Motzfeldt (S) tusagassiortunut sassarnerminni ima oqarpoq:

- Sillimaniarnermi poliikkikkut inissisimaneq allanngortoq aamma arajutsisimanngilarput, tamannalu sillimaffigisariaqarparput.

- Umiarsuarnik nutaanik Issittumi alapernaarsuutissanik pissarsinissaq pingaarnertut salliutitannut ilaavoq. Nalunnginngakku pingaaruteqaqisut. Kalaallit tamarmik isumannaatsuunissaannut.

Issittumi aamma Atlantikup Avannaani illersornissaq pillugu isumaqatigiissutitaaq allanik immikkoortoqalerumaartoq taannalu immikkoortuni siulliusoq, Troels Lund Poulsenip tusagassiortunut ataasinngornermi sassarnerminni ilisimatitsissutigaa. Saniatigut allamik suliniutinik arlalinnik imalimmik aasartinnagu isumaqatigiissuteqarumaarlutik taassuma naatsorsuutigaa.

Sakkutuut imarsiortut pillugit pilersaarutitaassaq aamma piariingajalerpoq.

Issittumi illersornissaq pillugu isumaqatigiissutitaaq ukiarli isumaqatigiinniutaavoq, Trumpilli USA Kalaallit Nunaannik sillimaniarnermi politikkikkut pisut pissutigalugit aqutsilertariaqarnerareeraalu tassa piareerpoq.