Trump Kalaallit Nunaat pillugu: Nunarsuup kiffaanngissuseqartup illersornissaa pineqarpoq

USA-p nunarput aqulersinnaagaa USA-mi præsident Donald Trump isumaqarpoq.

Las Vegasimiit Miamiliarnermini præsidentip timmisartuaniit Air Force Onemit tusagassiortunut taama oqarpoq.

Danmark nunatsinnik pisiumanermik itigartitsissaguni akuerissaneraa pillugu CNN-imit aperineqarami taama oqaaseqarpoq. Immiussamit Forbesimit saqqummiunneqartumit tamanna tusaaneqarsinnaavoq.

Trumpillu nutaarsiassaqartitsitsivik CNN isornartorsioreerlugu ima oqarpoq. 

- Pigilerumaaripput isumaqarpunga, Trump oqarpoq, ilanngullugu oqarluni, nunatta innuttaasui 57.00-ingajaat " uagutsinniikkusuttut".

Danmark qanoq piumasaqarniarnersoq nalullugu, "nunarsuulli kiffaanngissuseqartup illersornissaa pineqarmat, akuersinngikkunik inussiarninngilluinnassasoq" Trump oqarpoq.

Nunarsuup kiffaanngissuseqartup illersornissaata pineqarneranik oqaatsini uteriarlugit, Kinamit Ruslandimiillu nunatta imartaani umiarsuaqartoq, tamannalu pitsaanngitsoq oqarpoq.

- Uagut kiffaanngissuteqartitsisinnaasuunitta saniatigut USA-mut tunngassuteqanngilaq. Danmarkip kiffaanngissuseqarnissamut suliaq naammassisinnaanngilaa, Trump oqarpoq.

- Qimussinik marlunnik sapaatit akunneri marluk matuma siorna atuutilersitsipput, taannalu illersuinerusoralugu.

- Inuillu Danmarkimit pineqarnertik iluarinngilaat. Uagullu nuannaraatigut, USA-p præsidentia naggasiivoq.

Danmark USA-lu iligiilluartuusut Danskit ministeriunerat Mette Frederiksen oqarpoq.

- Danmark iligiiminut pitsaavoq, taamaaginnarniarpugullu, TV-2-mit apersoneqarnermini oqarpoq.

Danskit naalakkersuisuisa Donald Trumpip nunatsinnik aqutsiniarneranut isumaat allanngunngitsoq, DR-imut oqarpoq.

- Præsidentimit oqaatigineqartut tusareerpargut. Uagullu akissuterput allanngunngilaq, Mette Frederiksen DR-imut oqarpoq.