Danmark nunatsinni politiinut eqqartuussiveqarnermullu milliardingajannik aningaasaliissuteqartoq

Inatsiseqarnermut ministeri, Peter Hummelgaard Nuummiippoq, taassumalu inatsiseqarnermut naalakkersuisoq, Naaja Nathanielsen (IA) tusagassiortunik katersortitseqatigaa.

Taanna aappaagumit 2030-p tungaanut 850 millionit koruuninik aningaasaliissutissanik nassataqarpoq.

Tamanna inatsiseqarnermut ministereqarfimmit tusagassiuutinut nalunaarummi allassimavoq.

Aningaasat qanoq agguaanneqarnissaat ministereqarfiup naalakkersuisullu politiit unnerluussisussaatitaasullu pillugit nutaamik ukiunut arlalinnut isumaqatigiissuteqarnialerunik oqaluuserissavaat.

Aningaasat nunatsinni eqqartuussiveqarfimmut politiinullu pitsanngorsaataassapput. Amerlanerusunik atorfinitsitsisoqassaaq, politiit angallataat annertusineqassapput qarasaasiaqarnermullu tunngasut annertusarneqassallutik.

Eqqartuussiviup digitalinngorsarnera

Danskit naalakkersuisuisa pinerluttuliornermi suliat tamarmik Nuummut katersorusuppaat, unnerluussisussaatitaasoq taamaalilluni akisussaaffeqalissalluni. Taamaaliornikkut politiit piffissamik atuiunnaassapput, suliassallu pimoorunneqarnerullutik suliarineqalissallutik, illersornissamut ministereqarfik tusagassiuutinut nalunaarummi allappoq.

Politiini unnerluussisussaatitaasut amerlanerusut inatsisilerinermik ilinniarsimasunik periarfissaappallu Ilisimatusarfimminngaanneernerusunik siunissami taarserneqassapput.

Aningaasaliissutit nutaat tusagassiuutinut nalunaarut naapertorlugu nunatsinni eqqartuussivinni digitalikkut atortorissaarutit Danmarkimitulli pitsaassuseqalernissaat pillugu pitsanngorsaataassapput.

Eqqartuussivinnik digitalinngorsaanerup saniatigut nunatsinni inatsiseqarnermut atatillugu nutarterinermut aningaasartuutinut aamma aningaasaliisoqassaaq.

Minnerunngitsumillu allaffimmik nutaamik qarasaasiatigut paasissutissanik illersuinermut ilitsersuinermut pitsanngorsaataasussamik pilersitsisoqassaaq.

Politiit amerlanerusut

2030-p naannginnerani Kalaallit Nunaanni Politiinut 31-nik atorfinitsisoqassaaq. Atorfiit tamarmik qanoq agguataaqqanissaat inatsiseqarnermut ministereqarfimmit tusagassiuutinut nalunaarummi allassimanngilaq.

Kisianni atorfiit 9,5-it ukioq kaajallallugu atorfiit pinerlineqarsimasunut suliniutinut pitsanngorsaanermik aamma kinguaassiuutitigut pinerluuteqarnernik pinaveersaartitsinissamut matumani meeqqanut kinguaassiuutitigut atornerluisoqannginnissaanik suliniutinut pitsanngorsaanermik suliaqarfiussapput.

Politiinut kalaallisut oqaaseqartunut atugassarititaasut aamma pitsanngorsarneqassapput.

- Danskit naalakkersuisuisa kalaallisut oqaaseqartunik Kalaallit Nunaanni politiinngorniarfimmut atorfinitsitsiniarneq pitsanngorsarusuppaat, politeeqarfinnilu kalaallisut oqaasilinnik attassiniarnermut periarfissat pitsaanerusut pilersikkusullugit, ministereqarfik allappoq.

Tamatuma saniatigut politiit angallataat nutaanik atortorissaarutilerlugit pitsanngorsarneqassasut ministereqarfiup paasissutissiissutigaa.

Politeeqarfik nutaaq

Kalaallit Nunaanni Politiini atorfeqartut amerliartornerat ilutigalugu Nuummi politeeqarfimmi inissaqarniarneq aamma ajornartorsiutaaleriartorpoq.

Taamaammat danskit naalakkersuisui Nuummi politeeqarfiit qullersaqarfianik nutaamik pilersitseqataarusupput.

Politiinngorniarfik, qitiusumik upalungaarsimasut isertitsiviit allallu aamma tassani politeeqarfimmiissapput.