Sisimiuni pinerluuteqarsimasunut inissiisarfik oqummik asbestimillu eqqugaaqqasoq
Naajorarneq, niaqorlunneq anersaartorniarnikkullu ajornartorsiorneq, pinerlussimasunut Sisimiuni pinerluuteqarsimasunut inissiisarfimmi isersimasunit jannuaarimiilli ulluinnarsiutigineqartut tamakkuupput.
Sisimiuni pinerluuteqarsimasunut inissiisarfiup oqoqarlunilu asbesteqarnera pissutigalugu inissinneqarsimasut peqqissutsimikkut jannuaarimili eqqugaaqqallutik, tigummigallarneqartut oqaaseqartartuat kinaassutsiminik isertuussisoq oqaluttuarpoq.
- Tujorminarpoq januaarip qulingiluaani maanga iserpunga taava immaqa sapaatip akunnerata ataatsip iluani assakkut assut anillattalerpunga anersaartoraangamalu puakka siggarpaluttalerput, ullullu tamangajaasa niaqorluttalerlunga, taanna oqarpoq nangillunilu:
- Tassa taamaarrappugut naajorarneqalerrappugut taavalu niaqorluttarluta quersornerlu, arlariippugut taamaattugut, inissinneqarsimasut oqaaseqartartuat oqarpoq.
Sisimiuni pinerluuteqarsimasunut inissiisarfimmi perusuersartarfiit iluarsartuunneqarnerini asbestimik oqummillu nassaartoqarpoq. Naak iluarsartuussisoqaraluartoq isersimasunut suli sunniuteqarpoq
- Inuit suli taqqamunga isertarput, assigiinngitsut suligamik sanasut ruujorilerisut taavalu qarmaasut taavalu aamma sulisitsisut alakkarterisarlutik atortulersornatik uteraangamillu pujoralak kalittarlugu, taanna oqarpoq.
Ilungersunartoq
Pinerluuteqarsimasunut inissiisarfimmi asbestimik oqummillu nassaartoqareernerata kingorna tigummigallarneqartut peqqinnangitsumi najugaqarnertik pissutigalugu januaarimili maalaaruteqartalerput.
- Januaarip 31-annili ikioqatigiilluta ajoqutigut allattoriarlugit naammagittaalliorluta pisalerpugut, aamma taava qanittukkut allagaqaqqippugut, taanna oqarpoq.
Kalaallit Nunaanni Pinerluttunik Isumaginnittoqarfik KNR-imiit apersorniaraluarparput allakkatigulli ima akissuteqarpoq:
- Tassunga atatillugu inissinneqarsimasut pingajorarterutaanik pisariaqavissumik ikilisinneqarput tigummigallarneqartut uffarfinnik anartarfinnillu atuisinnaanissaat qulakkeerumallugu, Kalaallit Nunaanni Pinerluttunik Isumaginnittoqarfik allappoq.
Isersimasunik ikilisaasoqareeraluartoq allamut nuutsikkallarneqarsimannginnerat Peqatigiiffik Illersuisuni siulittaasup Tom Ostermannip pissusissamisoorsorinngilaa.
- Isumaqarpunga tamanna pissusissamisuunngitsoq tassami suli suliffeqarfinni allani taamatut oquttoqartillugu suliffeqarfiit matuneqartarput atuarfiit matuneqartarput suullu assigisaat tamarmik allamut illikartinneqartarput taamaattumik ajornartorsiut una ilungersunartutut isigivara, Tom Ostermann oqarpoq.
Iluarsartuussineq kinguaattoortoq
Kalaallit Nunanni Pinerluttunik Isumaginnittoqarfiup annerusumik iliuuseqarsimannginnera Tom Ostermannip isornartorsiorpaa.
- Ukua kiffaanngissusiiagaallutik tassaniititaasut inini paarnaaqqasuni immaqaluunniit avatangiisit paarnaaqqasuni taavalu silaannaq killilik inooqataaffigalugu tassani inooqataanerat isumaqarpunga isornartupilusuusoq, taanna oqarpoq.
Isersimasut sulisullu peqqissutsimikkut misissortinnissaat aamma neqeroorutigineqarpoq, isersimasullu immersuereernermi kingorna suli tusagaqaqqinnatik oqaaseqartartoq oqaluttuarpoq.
Iluarsartuussineq juunip naanerani naammassineqarnissaa naatsorsuutigineqaraluartoq kinguaattoorfiuvoq.
- Iluarsaartuussinerup naammassineqarnissaa sapaatit akunnerini 33-mi naammassineqarnissaa naatsorsuutigineqarpoq, Kalaallit Nunaanni Pinerluttunik Isumaginnittoqarfik allakkatigut akissuteqarluni allappoq.
