Qimussimik angalaneq kingulleq

Nukâka Coster-Waldau aamma isiginnaartitsisartoq Caspar Phillipson isiginnaartitsissummi inuttarineqarput.

Isiginnaartitsissusiaq taaguuteqartinneqarpoq Den Sidste Slæderejse - Qimussimik angalaneq kingulleq, tassanilu Knud Rasmussenip Arnarulunnguullu angalaqatigiinnerat imaannaanngitsoq attortisimanartorlu pillugu isiginnaartitsissutigineqarpoq.

Knud Rasmussenip kinaanera Danmarkimi amerlanernit ilisimaneqarpoq. Arnarulunnguarli ikittuinnarnit ilisimaneqarluni.

Kamilla Bach Mortensen isiginnaartitsissusiami ilitsersuisuuvoq.

Isiginnaartitsissusiap “Qimussimik angalaneq kingulleq” soqutigineqartorujussuunera isiginnaartitsisarfimmit Bellevue Teaterimit tupigusuutigineqarpoq.

Oqaluttuarisaanerup oqaluttuarinissaa pisariaqartoq

Isiginnaartitsissusiap takutinneqarnissaanut bilitsit tamangajammik pisiarineqarsimapput, immikkullu isiginnaartitsissutigineqarnissaa sivitsorneqarluni.

Nutaarsiassaqartitsiviit nunanit tamalaaneersut isiginnaartitsisarfimmut saaffiginnittarnerat immikkut illuinnartutut maluginiarneqarpoq, ullunilu makkunani pisunut soqutiginartunut isiginnaartitsisarfik qitiusoq, ritzau allaaserisaqarpoq.

Oqaluttuarisaaneq qallunaanit amerlasuunit sapiitsuliortunit nuannaartorineqartunit pilersinneqarpoq. Sapiitsuliortut amerlapput. Kalaallimilli arnamik sapiitsuliortumik Arnarulunnguatut ittumik aamma peqarpoq. Taanna oqaluttuarisariaqarparput, isiginnaartitsisarfiup Bellevue Teaterip pisortaa Pia Jette Hansen oqarpoq.

Isiginnaartitsissut Den Sidste Slæderejse isiginnaartitsisarfimmi Bellevue Teaterimi naggammik marsip aallaqqaataani isiginnaartitsissutigineqassaaq .

Isiginnaartitsissusiap nunatsinni takutinneqarnissaa maana misissorneqartoq Bellevue Teaterimi pisortaq Pia Jette Hansen KNR-imut oqarpoq.