Trumpip nunatsinnut tunngatillugu anguniagaata USA-mi tapersersortikinnera misissuinerup nutaap takutikkaa
Amerikamiut amerlanerussuteqarluartut Donald Trumpip Kalaallit Nunaata USA-mut ilanngunniarlugu anguniagaqarneranut akerliulluinnarput.
Tamanna The Associated Press-imit aamma NORC Center for Public Affairs Research-imillu isumasiuinermi nutaami tallimanngormat saqqummersumi paasinarsivoq.
USA-mi qinersisartut 24 procentiinnaat Donald Trumpip Kalaallit Nunaannut iliuuseqarnera tapersersorpaat, 72 procentillu akerliullutik.
Taakkunannga amerlanerit Trumpip nunanut allanut politikkeriaasaanik naammagisimaarinninngillat.
'Sanngiiffimmik' pilersitsisimasinnaasoq
Kisitsisit nutaat The Associated Press-ip saqqummiussai naapertorlugit, Amerikamiut præsidentiata Kalaallit Nunaannut tunngatillugu ajornartoornermi aqutsinera allaffeqarfianut 'sanngiiffimmik' pilersitsisimasinnaavoq.
Minnerunngitsumik parteeqataasa ilarpassuisa – pissutsini atuuttuni tamani tapersersortaatut ilisimaneqartaraluarlutik – Kalaallit Nunaannut tunngatillugu iliuusaanik naammagisimaarinninnginnerat isumasiuinerup takutimmagu.
Republikanerit qinersisartuisa akornanni apersorneqartut affangajai akipput, præsidentip Kalaallit Nunaannut taamatut pissusilersornera akerleralugu.
Tamanna apeqqutinut allanut, Donald Trumpip Republikanerit akornanni suli tapersersorteqarfigilluagaanut, sanilliullugu maluginiarnartuuvoq.
Nalinginnaasumit akerlerineqarujussuartoq
Republikanerit qinersisartuisa præsidenti sorpassuartigut tapersersortarsimavaat, assersuutigalugu præsidenti Venezuelami januaarimi sakkutuulersuimmat Iranimilu atomimik nukissiorfinnik siorna saassussimmat.
Demokraatit qinersisartuisa qinersisartullu attuumassuteqanngitsut akornanni suli tapersersortikinnerungaarpoq. Qinersisartut attuumassuteqanngitsut 15 procentiisa taamaallaat demokraatillu qinersisartuisa 7 procentiisa taamaallaat Kalaallit Nunaannut tunngatillugu ajornartorsiummi aqutsinera tapersersorpaat.
AP-NORC Amerikami inersimasunik 1.156-inik Donald Trumpip Europami nunanut Kalaallit Nunaannik aqutsinissamik kissaateqarnerminik akuerinninngitsunut akitsuusiiniarluni pilersaarutini taamaatiinnareeraalu Davosimilu oqalugiarnermini sakkutuunik atuinissaq pinngitsoortereeraalu, februaarip tallimaanniit arfineq-pingajuata tungaanut apersuilluni misissuivoq.
Amerikamiut Kalaallit Nunaata tiguarnissaa pillugu avissaartuunnerat siornatigut misissuinernit takuneqarsinnaavoq, naak sakkutuulersornissaq tapersersorteqarpianngikkaluartoq.
Trumpilli Kalaallit Nunaannut pilersaarutaata nuannarineqarpiannginnera, misissuinerup kingulliup takutippaa - allaat tapersersortaanit aalajaannernit.
