Trumpip nunarput pillugu pilersaarutaa USA-mi taperserneqarpianngitsoq inuit isumaannik paasiniaanerup takutippaa
Amerikamiut 54 procentii USA-p nunarput akisussaaffigilissagaa isumaqatiginngilaat.
Amerikami isummersuisartut Pew Research Centrep martsip naanerani inuit isumaannik paasiniaaneranni tamanna erserpoq.
23 procentiisa amerikamiut tiguaatikkusuppaat, 22 procentillu nalornillutik.
Amerikamiut præsidentiata, Donald Trumpip nunatsinnik tiguaanissamut eqqarsarnini piviusunngortikkunnanngikkaa inuit apersorneqartut 34 procentiisa ilimagaat.
23 procentiisali "ilimagilluinnarpaat".
Piumasaqaatit annertugaluarpataluunniit iliuuseqarniartoq
Trump novembarip tallimaani præsidentinngoramili qineqqusaarneq ilanngullugu USA-p "Kalaallit Nunaat pissarsiarissagaa" ilimagalugu oqaatigisaqattaarnikuuaa.
USA-llu nunarput pissarsiarissaguniuk qanorsuaq pisariaqartumik iliorsinnaallutik oqaatiginikuuaa.
- Kalaallit Nunaat pissarsiarissavarput. Aap, qulakkeeqqavoq, martsip 30-ani taanna oqarpoq.
Trumpilu naapertorlugu USA-p nunatut sillimaniarneranut nunarput pingaaruteqarluinnarpoq.
Amerikap præsidentiata tullersortaa, J.D. Vance nunatsinni amerikamiut sakkutooqarfiat martsip naanerani tikeraarpaa- tikeraarneralu nunatsinni oqartussanit isornartorsiorneqarpoq.
Inuit isumaannik paasiniaanermi amerikami apersorneqartut 3605-iupput 18-illu sinnerlugit ukioqarlutik.
Sisamaraarterutit sinnerlugit nalornipput
Apersuineq republikanerinik demokraatinillu apersuineruvoq. Amerikamiut nunatsinnik tiguaassasut Trumpip partiianianik qinersisartut 41 procentiisa isumaqatigaat, 28 procentiilu akerliullutik.
31 procentii nalornipput.
Inuit isumaannik misissuinermi amerikamiut Gaza akisussaaffigilissaneraat apeqqut ilaavoq.
62 procentii akerliupput, 15 procentiisalu Gaza USA-mit akisussaaffigilertikkusuppaat.
Affangajai - tassa 44 procentit - republikanerit Gaza USA-mit akisussaaffigilerneqarnissaa akerleraat, 27 procentillu Gaza USA-mit akisussaaffigilertikkusuppaat.
