Ataatsimut isigalugu: Amerikamiut præsidentiata Trumpip nunarput pillugu anguniagaqarnera
Amerikamiut præsidentiata, Donald Trumpip nunatsinnik aqutsilernissani piffissami sivitsortumi eqqarsaatigaa.
Taassuma siullermik præsidentiunermi nalaani tassa 2019-imi nunarput pisiarerusullugu oqaatigaa. Taamani naalakkersuisut siulittaasorisaata, Kim Kielsenip nunarput tuniniagaanngitsoq oqaatigaa, danskillu ministeriunerata, Mette Frederiksenip tamanna “isumassaqanngilluinnartuunerarpaa”.
Tamannali Donald Trumpimut unitsitsinngilaq. Taassumami præsidentitut aappassaanik ivertinneqanngitsiarluni – 2024-mi decembarimi – nunarput aammaarluni eqqaaqqippaa.
- Nunap sillimaniarneranut aamma nunarsuarmi kiffaanngissuseqarnissamut atatillugu USA-p Kalaallit Nunaannik piginnittuunissaa aqutsinissaalu pisariaqarluinnarpoq, Donald Trump Danmarkimi aallartitamik nutaamik toqqaanermut atatillugu tusagassiuutinut nalunaarummi allappoq.
Naalakkersuisut siulittaasuata, Múte B. Egede (IA) maanna siulittaasuugallartup Trumpip itigartitsivigaa.
- Kalaallit Nunaat inuiaat Kalaallit pigaat. Tuniniagaanngilagut aamma tuniniagaalernavianngilagut. Kiffaanngissuseq ukiorpassuarni sorsuutigisarput sapangissanngilarput, taanna Facebookimini allappoq.
Donald Trump Jr.-ip Nuuk tikeraaraa
Præsidentip ernera, Donald Trump Jr. Nuummukariartortoq pillugu KNR-ip saqqummiuppaa.
Præsidentip ernera nunatsinni illoqarfiit pingaarnersaannut januaarip arfineq-aappaani ulloq ataaseq tikeraarpoq, tamannalu pissutigalugu nunarsuarmi tusagassiortortut Nuummukakaapput.
- Maaniinnerput nuannarilluinnarparput. Manna tupinnarluinnartoq takusarlugu takornariarpugut. Maanngarnissarput piffissami sivisugaami oqaluuserinikuuarput. Isikkivik alutornarluinnarpoq, Trump Jr. Nuummut tikikkami KNR-imut oqarpoq.
Præsidentip ernerata Nuummiinnerata nalaani præsidenti Floridami tusagassiortunik katersortitsinermi nunarput pillugu oqaaseqaqqippoq. Taanna tusagassiortumik aperineqarami sakkutuulersornissaq mattussinnaanagu oqaatigaa.
Múte B. Egede ulloq taanna pilersaarutaasoq malillugu Danmarkimut naalagaaffeqatigiinni ukiumoortumik ataatsimiinnissaq pillugu aallarpoq. Taassumalu Kalaallit Nunaat kalaallit pigigaat Facebookikkut oqaatigeqqippaa.
Naalli USA-mit sioorasaaruteqartoqaraluartoq danskit ministeriunerata, Mette Frederiksenip (S) USA Danmarkip iligisaani suli qaninnerpaasoq oqaatigaa.
Nunarput uagut pigaarput
Ministeriuneq, Mette Frederiksen aamma naalakkersuisut siulittaasuat, Múte B. Egede Ministeriuneqarfimmit ataatsimoorlutik tusagassiortunik katersortitsipput.
- Kalaallit Nunaat kalaallit pigaat, Qallunaajorusunngilagut, amerikamioorusunngilagut kalaaliorusuppugut, Múte B. Egede tusagassiortunik katersortitsinermi oqarpoq, tamannalu Mette Frederiksenip taperserpaa-
Naalakkersuisut siulittaasuata USA-p suleqatiginera pingaaruteqartoq tamannali nunatsinni piumasaqaatinik tunngaveqassasoq oqaatigaa. Tamanna amerikamiut tv-qarfiannit, Fox Newsimit januaarip 16-ianni apersorneqarnermini uteqqippaa.
Danskit ministeriunerata Donald Trump januaarip 15-ianni oqarasuaatikkut oqaloqatigaa. Taassumalu nunarput tuniniagaangitsoq oqaatigeqqippaa.
Trumpip anguniakkani uteqqikkaa
Præsidentip Trumpip nunatsinni aqutsilerusunnini januaarip 20-ani, januaarip 25-ani februaarillu 19-ianni oqaatigeqqippaa.
- Kalaallit Nunaat uagutsinnit aqunneqalissasoq isumaqarpunga. Pissarsiarissagipput isumaqarpunga, aamma inuit uagut peqatigerusukkaatigut isumaqarpunga, taanna Air Force One-imiilluni oqarpoq.
Taassuma tamatuma saniatigut russit kina-miullu sakkutuuisa umiarsuaat Kalaallit Nunaanni “sumi tamaaniittut” ernumassutigalugit oqaatigaa.
Kalaallinut oqariartuuteqartoq
Amerikami kongressimi marsip sisamaanni præsidentip oqalugiarnermini kalaallit toqqaannartumik oqariartuuteqarfigai.
USA-mi nunanilu tamalaani sillimaniarneq pillugu Kalaallit Nunaat pisariaqartillugu taassuma arlaleriarluni oqaatigaa, USA-p Kalaallit Nunaat “arlaatigullu” iluatsikkumaaraa ilimasulluni.
- Illersussavatsigit, pisuunngortissavatsigit, ataatsimoorlutalu Kalaallit Nunaat takunikuunngisaannakkassitut kivissavarput, State of the Union-imi oqalugiarnermini oqarpoq.
Inatsisartuni qinersinerup nalaani taama oqariartuuteqarpoq.
Tiguaanissaq mattutinngikkaa
Donald Trumpip Kalaallit Nunaanik tiguaanissaq mattunnianngilaa. Taanna tusagassiortumik tiguaasoqarsinnaanersoq aperineqarami, ima akissuteqarpoq:
- Taama pisoqarnissaa ilimagaara.
Oqaaseq tiguaaneq, nammineq naalagaaffigisamut ilanngutititsinermik isumaqarpoq.
Amerikamiut præsidentiat NATO-p generalsekretæriata Mark Ruttep tusagassiortunik marsip 13-ianni katersortitseqatiginerata nalaani taama oqaaseqarpoq.
Qinersinerup inernerata Demokraatit partiini annerpaanngorneranik takutitsineranit ullut marluk qaangiutiinnartut tamanna pivoq.
Ataatsimut oqariartuuteqartut
Kalaallit partiivisa siuttui Donald Trumpip oqaaseqarnerata kingunerisaanik marsip 14-ianni ataatsimut tusagassiuutinut nalunaaruteqarput.
- Uagut - Partiit siulittaasui - Kalaallit Nunaanik tiguaaniarnermik aammalu aqutsiniarnermik siunertaqarnermik oqaaseqartoqarnera akuerinngilarput. Partiini siulittaasutut akuerinngilarput nunat ikinngutigiit aammalu illersornissakkut ataatsimooqatigiit akornanni taamatut pissuseqartoqarnera.
Tusagassiuutinut nalunaarut Demokraatinit Jens-Frederik Nielsenimit, Naleqqamit Pele Brobergimit, Inuit Ataqatigiinnit Múte B. Egedemit, Siumumit Vivian Motzfeldtimit Atassummiillu Aqqalu C. Jeremiassenimit atsiorneqarpoq.
Akerliussutsimik takutitsineq oqaluttuarisaanermi asseqanngitsoq
Nuummi, Sisimiuni, Qaanaamilu inuit 1000-t tungaannoortut marsip 15-ianni Donald Trumpimut naammaqaaq-mik oqariartuuteqarlutik akerliussutsimik takutitsipput.
Naalakkersuisut siulittaasorigallagaat, Múte B. Egede aamma qinersinermi taaguunneqarnerpaaq Demokraatinit Jens-Frederik Nielsen maanna naalakkersuisunik nutaanik pilersitsinissamut isumaqatiginninnialeruttortoq akerliussutsimik takutitsisunut oqaaseqarput.
- Amerikamiit oqallorissaarneq assuarnartumillu oqalunneq nunatut inuiattut ataatsimoornerput imatut takutipparput, Jens-Frederik Nielsen suaartarpoq,
Inuiaallu akillugu suaartaapput - Kalaallit Nunaat, Kalaallit Nunaat, Kalaallit Nunaat!
Amerikamiut tikeraarnissaminnik nalunaaruteqartut
USA-mi arnat sallersaasa tulliata Usha Vancep Sisimiunukalernera Sermitsiaq marsip 22-ani saqqummiuppaa.
Tusagassiorfiup saqqummiussaa naapertorlugu amerikamiut præsidentiata tullersortaata, J. D. Vancep nulia Usha Vance Avannaata Qimussersuanut malinnaajartorniarpoq.
USA-p sillimaniarnermut siunnersortaa, Mike Waltz aamma nukissiuuteqarnermut ministeriat Chris Wright aamma nunatsinnut tikeraarniartut Det Hvide Husip marsip 24-anni nalunaarutigaa.
Tamanna nutaanik naalakkersuisoqalernissaanik isumaqatigiinnialeruttornerup nalaani pivoq.
Tikeraarniarnerannik nalunaaruteqarneq Múte B. Egedemit isornartorsiorneqangaatsiarpoq, taanna Facebookikkut allappoq:
- Ersarissumik Amerikarmiunut oqariartuutigineqarnikuuvoq, Naalakkersuisut nutaat ivertinneqarpata oqaloqatigiinnerit pissappata ingerlanneqarsinnaapput.
- Taamatuttaarlu nunatsinni namminiussuseqarnerput tamallu oqartussaanerat tunngavigalugu ingerlaaserput, kikkuugaluartulluunniit avatitsinneersut ataqqissagaat sunniiniarfigissanngikkaallu naqissuserneqarluni, taanna allappoq.
Múte B. Egedep nunarsuarmiut tamatuma saniatigut nunatsinnut tapersiineroqquai.
Ministeriunerup, Mette Frederiksenip oqaatsinik atukkaminik sakkortunerulersitsilluni tikeraarniarnerat “akuersaarneqarsinnaanngitsoq” oqaatigaa.
Pilersaarutinik allanngortitsisut
USA-p præsidentiata tullersortaata J. D. Vancep marsip 28-anni nunatsinnukalernini inoqatinut attaveqaatikkut X-ikkut nalunaarutigaa.
- Kalaallit Nunaat Danmarkimit piffissami sivisuallaami soqutiginngitsuusaarneqartoq isumaqarpugut. Tamannalu Kalaallit Nunaata sillimaniarneranut uggornartuuvoq, tamannalu nunarsuup sinnerani sillimaniarnermut aamma uggornartuulluni, taanna videomi oqarpoq.
Ushap aamma J.D. Vancep pilersaarutitik allanngortillugit Pituffik Space Base tikeraaginnassavaat. Tamatumalu saniatigut USA-mi sillimaniarnermut siunnersorti, Mike Waltz aamma nukissiuutinut ministeri, Chris Wright nunatsinnukanngiinnassasut Det Hvide Husip nalunaarutigaa.
Kalaallit qularutiginnikkunnaartinniarai
Præsidentip tullersortaata nunatsinnut tikeraarnissaa Donald Trumpip podcastiliortartumit Vince Coglianese-imit marsip 26-anni apersorneqarnermini oqaasertalerneruaa. Tikeraarneq USA-p Kalaallit Nunaannik pisariaqartitsineranik kalaallinut paasititsinerussasoq præsidentip podcastimi oqaatigaa.
- Taava oqassallunga nuannarinngikkaluarpara, kisianni pisariaqartipparput, Donald Trump oqarpoq.
Præsidenti kalaallit USA-mut ilaarusunnersut aperineqarami ima akissuteqarpoq:
- Naluara. Kisianni piumanngissorinngilakka. Kisianni taamaaliortariaqarpugut. Qularinnikkunnaarsittariaqarpagut.
- Nuna pisariaqarparput, pissutigalugu nunarsuup ilarujussua taanna pigeqqaartinnagu illersorneqarsinnaanngilaq. Taamaammat pissarsiarisariaqarparput, pissarsiarissagippullu isumaqarpunga, Donald Trump oqarpoq.
USA Kalaallit Nunaannik allaat aqutsilernissamik pisariaqartitsilluni unnuk taanna tusagassiortunik katersortitsinermi præsidenti oqarpoq.
- Kalaallit Nunaat pisariaqartipparput nunarsuup aamma Kalaallit Nunaat pissagipput pisariaqartippaa - aamma Danmarkip, Donald Trump oqarpoq.
