Múte B. Egede: USA-miit tikeraartut Naalakkersuisuugallartut ataatsimeeqatiginavianngikkaat
Sapaatip-akunnerata ingerlanerani Amerikarmiunit tikeraartoqarniaraluartoq, tikeraat Naalakkersuisuugallartunik ataatsimeeqateqassanngillat.
Taama Naalakkersuugallartut siulittaasorigallagaat Mute B. Egede (IA) facebokkimut allappoq.
- Ersarissumik Amerikarmiunut oqariartuutigineqarnikuuvoq, nunatsinni qinersinerup kingorna suli Naalakkersuisunngortitsisoqanngimmat aatsaat Naalakkersuisut nutaat ivertinneqarpata oqaloqatigiinnerit pissappata ingerlanneqarsinnaapput.
-taaamatuttaarlu nunatsinni namminiussuseqarnerput tamallu oqartussaanerat tunngavigalugu ingerlaaserput, kikkuugaluartulluunniit avatitsinneersut ataqqissagaat sunniiniarfigissanngikkaallu naqissuserneqarluni, Mute B. Egede (IA) facebokkimut ilaatigut taama allappoq.
USA-p præsidentiata tullersortaa J.D. Vancep nulia, Usha Vance, ernerisa ilaat ilagalugu, aamma USA-p nunarsuarmi sillimaniarnermut siunnersuisua, Mike Waltz, kiisalu USA-p nukissiuuteqarnermut ministeria, Chris Wright, peqatigalugit sisamanngorpat Kalaallit Nunaannukassaaq.
Angalanissamik pilersaarut naapertorlugu, tikeraat oqaluttuarisaanermut tunngatillugu sumiiffinnik alakkarterissapput, Kalaallit Nunaanni kulturi pillugu ilinniassapput kiisalu nunatsinni qimussernermi unammisitsinermut peqataassallutik.
USA-miit tikeraarneq "namminerisamik angalanerinnaaneraraluaraat", taamatut isiginiaanissaq naammaginanngitsoq, Múte B. Egede oqarpoq.
- Takusinnaavarput maanna tikeraarneq qanoq ilungersunartigisumik oqallisaalersimasoq.
Múte B. Egede: Nunat tamalaat erseqqarinnerusumik akerliussutsimik takutitsisariaqarput
Sermitsiamut oqaaseqartarnermini oqariartuutigaa nunarsuaq tamakkerlugu ataatsimoornikkut USA-p Kalaallit Nunaannut pissusilersorneranut sakkortunerusumik akerliussutsimik takutitsisariaqartut.
USA-p præsidentia, Donald Trump, siusinnerusukkut arlaleriaqisumik oqaatigereerpaa Kalaallit Nunaata USA-mut ilanngunnera kissaatigalugu.
- Taamaakkaluartoq nunat iligut allat suleqatigisartakkagullu aammalu ikinngutitut isigisagut toqqortertutut pissusilersorput, taamaallaallu isussunngiluatsiaannarlutik teqeqqunnguamilu inissisimasuusinngiluatsiaannarlutik uagutsinnut tapersersuinertik oqaatigisarpaat, tamannali aamma sunniuteqanngilaq, taamaammat nipituumik ersarissumillu tapersersuilinngippata, ullut tamaasa ajornartorsiut annertusiartuinnassaaq, amerikamiullu kimigiisernerat annertusiartuinnassaaq, taamaattumik suleqatigisartakkatta ikinngutittalu erseqqissumik tapersersuinertik oqaatigisariaqarpaat, Múte Bourup Egede Sermitsiamut oqarpoq.
Taamaattumik aamma naalakkersuisut nutaat piaartumik pilersinneqarnissaat sulissutigisariaqartoq, Múte B. Egede isumaqarpoq.
Naalakkersuisunik nutaanik pilersitsinissamut isumaqatigiissuteqarnissaq suli oqaluuserineqartoq oqaatigineqarpoq.
