Múte B. Egede: Tuniniagaanngilagut aamma tuniniagaalernavianngilagut
- Kalaallit Nunaat inuiaat Kalaallit pigaat. Tuniniagaanngilagut aamma tuniniagaalernavianngilagut. Kiffaanngissuseq ukiorpassuarni sorsuutigisarput sapangissanngilarput.
USA Kalaallit Nunaatalu attaveqatigiinnera pillugu, USA-mi præsidentinngoqqilersup Donald Trumpip oqallisigisassanngortitseqqiinerata kingorna, naalakkersuisut siulittaasuata Múte B. Egedep (IA) taama erseqqitsigisumik Facebookimi allappoq.
Donald Trump nunarput aatsaat pisiariumalersaanngilaa, nunarpullu qanoq soqutigitiginerlugu unnuaq takuteqqippaa.
- Nunarsuaq tamakkerlugu eqqissineqassappat, USA-p Kalaallit Nunaat oqartussaaffigisariaqarpaa, Trump attaveqaqatigiittarfiutimini Truth Socialimi taama allappoq.
Múte B. Egedep Kalaallit Nunaata tuniniagaaneranik isuma akuersaanngilluinnarpaa, taamaattorli suleqatigiittoqarnissaa pisariaqartuusoq oqaatigalugu. Taanna naapertorlugu nunanik allanik isumaqatigiissuteqartarniarnerit Danmarkikkooqqaartuaannartariaqanngillat.
- Nunarsuarmioqatitsinnilli suleqateqarnissamut niueqateqarnissamullu suli ammassaagut, pingaartumik nunat sanilerisavut eqqarsaatigalugit. Sunami tamarmi Danmarkikkooqqaarsinnaanngilaq, taanna taama Facebookimi allappoq nangillunilu:
- Suleqateqarnermi puigunngisaannassavarput uagut naleqartitavut tunngavigalugit ingerlasoqassammat. Qaqagumummi inuiaat Kalaallit nunaminnut piginnittuunerat immeraassutaassanngilaq.
Nunatta pingaaruteqarneranut paasinninneq
Nunap namminersortuuneranut USA-mullu attaveqateqarneranut tunngatillugu, Kalaallit Nunaata Folketingimi ilaasortaatitaasa naalakkersuisut siulittaasuat isumaqatigaat.
Aaja Chemnitz (IA) Aki-Matilda Høegh Damilu (S) USA-mik siunissami suleqatigiissinnaanissaq pillugu nunat pineqartut akornanni oqaloqatigiissutigineqassasoq isumaqarput.
- Kalaallit Nunaat tuniniagaanngilaq, Aaja Chemnitz Ritzauimut oqarpoq, erseqqissaallunilu pisuni tamani Kalaallit Nunaat Danmarkiunngitsoq aalajangiisuusussaasoq.
USA-mik suleqateqarnerulernissaq ammaffigaarput, Amerikamiullu Kalaallit Nunaanni aallartitaqarfianik ammaasoqaqqammisoq eqqaallugu.
Trumpip Kalallit Nunaata oqartussaassuseqarfigerusunnera, Nunatta nunarsuarmi politikkikkut pingaarutilimmik inissisimaneranik takutitsisoq Aki-Matilda Høegh Dam isumaqarpoq.
Trumpilli pilersaarutai mattunneqassanngitsut DR naapertorlugu taanna isumaqarpoq.
- Præsident Trumpip Kalaallit Nunaannut soqutiginninneranut tunngaverpia paaserusullugu, ammasumik oqaloqatiginissaanut peqataarusuppugut, taanna taama oqarpoq.
- Oqallinnerillu nunatsinnit peqataasoqartinnagu ingerlanneqarsinnaanngillat. Tamanna pisariaqaannanngilaq piumasaqaataavoq, taanna taama oqarpoq.
