USA-p Nuummi sinniisoqarfissaa sapaatip-akunnerata tulliani ammassasoq
USA-p erfalasuni pingasunngorneq juunip ulluisa 10-ani amussavaa nunatsinnilu sinniisoqarfini pisortatigoortumik ammassallugu. Amerikamiut allartitaatut atorfilik, Sung Choi KNR-imut mailikkut taama paasissutissiivoq.
Ammaanersiornermi ilassinnittoqassaaq erfalsorlu silami amuneqassalluni. Ullormi tassani kikkut peqataanissaat naatsorsuutigineqarnersoq paasissutissiissutigineqanngilaq.
USA-p nunatsinnut soqutiginninnera
- USA 83 millionit koruuninik nunatsinni suliniutinut assigiinngitsunut aningaasaliivoq.
- USA-p præsidentiata, Donald Trumpip, nunatsinnik pisiarinninnialikkersaarneraniit ukiup affaa sinnilaarlugu qaangiutereersorlu tamanna pivoq.
2019:
- Aggustip ulluisa 15-iat 2019: Donald Trumpip nunarput pisiarinialikkersaaraa, USA-mi tusagassiorfiit allaatigaat. Aallaatigisaat kinaassutsimik isertuussisunit paasissutissanik aallaaveqarput.
- Aggustip ulluisa 16-iat: Kalaallit Nunaat tuniniagaanngitsoq, Naalakkersuisut siulittaasuata, Kim Kielsenip (S), erseqqissarpaa.
- Danmarkip ministeriunerata, Mette Frederiksenip, tamanna pillugu oqallinneq pisariaqanngitsuunerarpaa.
- Donal Trumpip Mette Frederiksen ataatsimeeqatigiartorlugu septemarip ulluisa aappaanni pingajuannilu Københavnimiittussaagaluarpoq. Kim Kielsen Savamlimmiunilu lagmandi Københavnimi aamma ataatsimeeqataasussaagaluarput. Issittoq isumannaallisaanermullu politikki pillugit ataatsimeeqatigiittussaagaluarput, Trumpilli tikeraarnissaraluani taamaatippaa.
- USA sinniisoqarfimmik nunatsinni aammaaqqinnissaminut pilersaartoq, nutaarsiassaqartitsivik AP Amerikap nunanut allanut tunngasunut ministereqarfiata Amerikami naalagaaffiit inatsisartuinut allagai naapertorlugit allappoq.
2020:
- Ruslandip Kinallu Issittumi najuunnerat USA-p aarleqqutigigaa, Amerikap Danmarkimi aallartitaa Carla Sands Altingetimut apriilip ulluisa 20-anni isumaliuutersuummini allappoq. USA nunatsinnut atassuteqalerusullunilu nunatsinni ineriartortitsinermi siuarsaaqataarusuttoq, taanna allappoq.
- USA 12,1 millionit dollarinik - 83 millionit koruunit missaannik - nunatsinni innuttaasut iluaqutigisinnaasaannik suliniutinut aningaasaliisoq, Namminersorlutik Oqartussat apriilip ulluisa 23-anni ilisimatitsipput.
USA Nuummi allaffimmik siorna maajimi ammaareernikuuvoq. Sung Choi-ilu taamanilu Nuummi Københavnimilu aallartitaqarfimmi nikerartumik sulisarluni.
Taassuma nunatta USA-llu politikkikkut inuussutissarsiuteqarnikkullu attaveqarnikkut suleqatigiinnerat suliarisalissavai.
Illersornissaqarfiup allaffeqarfiani sinniisoqarfeqassasoq
Sinniisoqarfimmi sulisut pingasunngorpat suliartorunik Issittumi Sakkutooqarfimmi Nuummi sulisut illoqatigissavaat.
Sinniisoqarfimmi illorsuarmi tassaniissoq, amerikamiut Danmarkimi aallartitaata, Carla Sandsip maajip qaammataata aallartinnerani nalunaarutigaa.
Amerikamiut sinniisuisa qanoq sivisutigisumik Issittumi Sakkutooqarfimmiinnissaat suli uppernarsarneqanngilaq.
AAMMA ATUARUK USA nunarput avammut ammaqqippat nunatsinni sinniisoqarfeqalissasoq
- Suleqatigisagut ikiortarpagut, soorlu taakku ikiortaraatigut danskit illersornissamut ministeriat, Trine Bramsen (S) KNR-imut mailikkut allannikuuvoq.
- USA-p Kalaallit Nunaanni sinniisoqarfissaata aallaqqaammut Issittumi Sakkutooqarfiup illuanniissinnaanissaa danskit naalakkersuisuisa akuerinikuuaat, ministeri oqarpoq.
USA Nuummi 1940-mit 1953-imut sinniisoqarfeqareernikuuvoq. Island Nuummi 2013-imi sinniisoqarfeqalerpoq, tamannalu sorsunnersuup aappaata kingorna nunanit allanit sinniisoqarfinnit siulliulluni.
