Trumpip ajugaaneranut qisuariaatit: Kalaallit Nunaata USA-llu suleqatigiinnerat ingerlaannassaaq

- Siullertut amerikami tamat oqartussaaqataaneranni aalajangigaannik inernerusoq soorunami ersarissivoq, taamaammat taanna oqaatigiinnarusuppara pilluaqqusinertut. Qinersineq nunatsinnit pissangalluta soorunami utaqqisimavarput, Nunanut allanut naalakkersuisoq Vivian Motzfeldt oqarpoq.

Naallu USA nutaamik præsidentitaartussanngortoq, taannalu Donald Trumpiusoq, USA-p nunattalu akornanni suleqatigiinnerup allannguuteqangaarnissaa Vivian Motzfeldtip ilimaginngilaa:

- Taamaammat suleqatigiinnerit ingerlaqqinnissaannut tunngaviit taakkua pitsaasut atorlugit suleqatigiinneq nanginneqassasoq naatsorsuutigeqqissaarpara, Vivian Motzfeldt oqarpoq.

Inuit Ataqatigiit sinnerlugit Folketingimut ilaasortap Aaja Chemnitzip, Donald Trumpip ajugaanera aamma oqaaseqarfigaa.

USA-mi præsidentimut qinersinerup allatut inerneqarsimanissaa taassuma neriuutigisimagaluarpaa.

- Donald Trumpip ajugaanera miserratiginagu tupaallaatigaara. Kamala Harrisip ajugaanissaa amerlasuujulluta neriuutigigaluarparput, Aaja Chemnitz oqarpoq.

Inuilli allatut ilaatigut eqqarsartartut suleqatiginissaat sungiusimallugu taassuma erseqqissaatigaa.

- Amerikamiullu qinersipput, taakku præsidentissartik namminneq qinissavaat, præsidentinngortorlu suleqatigisinnaasariaqarparput, aamma kinaagaluarpalluunniit, Aaja Chemnitz oqarpoq.

KNR-ip naalakkersuisut siulittaasuat Mute B. Egede, USA-mi qinersinerup inernera pillugu oqaaseqartinniarsaraa. Sulili akissutissarsinngilagut.