Donald Trump USA-mi præsidentimut qinersinermi ajugaasoq
Donald Trump 2016-imit ukiunilu tulliuttuni sisamani USA-mi præsidentit 45-ssaraat.
Maanna præsidentit 47-ssarissavaat, præsidentillu Washington D.C.-mi illorsuani ukiuni tulliuttuni sisamani najugaqarsinnaanngorluni.
Nutaarsiassaqartitsivik AP, qinersinermut atatillugu paasissutissaaterpassuit aallaavigalugit erseqqissaatigaa.
Præsidentimut qinigassanngortittup Trumpip naalagaaffimmi Wisconsinimi ajugaanera nalunaarutigineqareersorlu præsidentitut qinigaaneranik nalunaaruteqartoqarpoq.
Naalakkersuinikkut siuttut arlallit pilluaqqusisut
Naalakkersuinikkut siuttut arlallit Trumpip qinersinermi ajugaanerani pilluaqqusipput.
Danmarkimi ministeriuneq Mette Frederiksen taakkununnga ilaavoq:
- Qinersinermi ajugaanini pilluarit Donald Trump. USA pingaarnertut iligaarput. USA-p Danmarkillu suleqatigiilluarnerat attakkusupparput, Atlantikup nalaani suleqatigiinnerup, kinguaariinni amerlasuuni attanneqarsimasup, ingerlaannarnissaa kissaatigalugu, Mette Frederiksen, ministeriunerup allattoqarfianit tusagassiorfinnut nalunaarummi oqarpoq.
USA-p Danmarkillu illersornissakkut suleqatigiinnerata nukittorsarneqarnissaa taassuma qilanaaraa.
Ukrainep Ruslandimit saassunneqarsimasup tapersersorneqarnissaa immikkut pingaarutilittut inissisimavoq. Danmarkimit, kisiannili aamma USA-mit. Rusland Kinamit ikiorneqarneqartinnani Ukrainemi sorsussinnaanngitsoq Mette Frederiksen isumaqarpoq.
- Tamatta isumannaatsuunissarput uani pineqarpoq, taanna oqarpoq.
EU-Kommissionip siulittaasuata Ursula von der Leyenip Donald Trump pilluaqquaa, EU-llu USA-llu iligiinnerisa attanneqarnissaa kaammattuutigalugu.
Israelip ministeriunerata Benjamin Netanyahup Trumpip ajugaanera oqaluttuarisaanermi uteqqinnerit annersaattut taavaa, Donald Trumpilu nuilialu Melania Trump pilluaqqullugit.
USA-mi præsidentimut qinersinermi ajugaasuunini Donald Trumpip nunatta nalunaaqutaa naapertorlugu ullaaq manna oqalugiarnermi erseqqissaatigaa.
Demokratit qinigassanngortitaat Kamala Harris ullumi kingusinnerusukkut aatsaat oqalugiarniarpoq.
