USA-mi præsidentimut qinersineq: Trump qinersinermi taasinernik kisitsinerni siuttuusoq

USA-mi naalagaaffinni assigiinngitsuni taasinernik kisitsinerit suli naammassinngillat. Donald Trumpili naalagaaffinni pingaarutilinni arlalinni siuttuuvoq, USA-llu præsidentiisa 47-ssaattut qinigaasimasutut imminut suaarutigaluni.

Allattoq Mads Lynge

novembarip 06-at 2024 06:17

USA-mi præsidentimut qinersinermi ajugaasumik suli nalunaarutiginnittoqanngilaq.

Donald Trumpili USA-mi præsidentitut qinigaaqqittutut ullaaq manna isikkoqarpoq.

Taannami naalagaaffinni qinersinermut atatillugu pingaarutilinni, Demokratit sinnerlugit qinigassanngortitamut Kamala Harrisimut naleqqiullugu qinersisartut sinnerlugit taasisartunik amerlanernik pissarsisimavoq.

Naalagaaffinni assigiinngitsuni qinersinermi taasinerit suli kisinneqartussaapput.

Aamma atuarukKalaaleq Trumpimut nuannaartorinnittoq amerikap aqquserngani

Donald Trump qinersinermi ajugaasutut imminut suaarutiginnereerpoq. Naalagaaffimmi Floridami oqalugiartilluni ima oqartoq DR-ip issuarpaa:

- USA-p piginnaatitsissummik siornatigut takuneqarsimanngitsumik tunivaatigut, republikanerillu USA-p inatsisartuisa aappaanni Senatimi amerlanerussuteqalernerat tikkuarlugu.

Donald Trump præsidentimut qinersinermi ajugaasutut pisortatigoortumik suli nalunaarutigineqanngilaq.

Harrisili Trumpilu qinersinermi naligiissimaqisut kisitsisit takutippaat, tassami illuatungeriit 4 procentpointinik taamaallaat nikingassuteqarput.

Nutaarsiassami kukkunermik nassaarsimaguit uunga allaffigineqarsinnaavugut.