Kalaaleq Trumpimut nuannaartorinnittoq amerikap aqquserngani
Jørgen Boassen Trumpimut nuannaartorinnittoqaviuvoq.
Taamaattumillu Donald Trump USA-mi præsidentinngoqqinniassammat tapersersuiartorluni maanna USA-miippoq.
Naak amerikami qinersisoqarnera naammassiartuleraluartoq, Boassenip ulapinnera marathonitut issinnaavoq:
- Illunut kasuttoqattaarpugut, immaqa 8 tiimit angalaarpugut, alugut sussaajunnaavillutik. Illut tulleriaarlugit, kina tassni najugaqarnersoq takusinnaallugu mobiliminni appeqaramik, taanna oqarpoq.
Kajumissutsiminnik sakkutuut pisuttut
Peqatigiiffimmit "Mighty American Strike Force"-mit kajumissutsimik peqataasut Jørgen Boassenip ingerlaartaaqatigai.
Kajumissutsimik peqatigiit, inuinnaat sunniiniarlutik suliniarneranik taaneqartarput, taakkulu Donald Trumpip præsidentinngoqqinnissaa anguniagaraat.
Trump pillugu atortut digitalit- analogillu ikiortigalugit suliniuteqarput. Oqarasuaat angallattagaq nassarlugu matumiik matumut ingerlaartaqattaarput:
- Illumiit illumut pisuttaarpugut. Appi atorlugu nalornisuunersoq partii sorlermiinnersorluunniit takusinnaasarpaat. Naluara taakku qanoq isillutik paasisarsimaneraat, taanna oqarpoq.
Amerikami ambassadøri
Jørgen Boassenip USA-mut angalanera Mighty American Strike Forcemit akilerneqarpoq.
Taassuma USA-mut tallimanngormat tikinnerminiilli nunarput pillugu oqaluttuarnissani pingaarnertut suliassaraa.
- Nunatsinninngaanniit soqutiginnittumik tikittoqarmat assut nuannaarput, aammalu USA-mi qineqqusaarneq qanoq ingerlariaaseqarnersoq soqutiginnittoqarmat.
Unnugu USA-mi præsidentimut qinersisoqasassaaq, Trumpili qinigaassagaluarpat nunatsinnut sunniuteqassasoq Jørgen Boassen isumaqarpoq.
Trumpip nunarput perusuppaa
Trumpimi nunatsinnut pingaartitsisuusoq, Jørgen Boassen isumaqarpoq:
- Soorunami, kingullermik præsidentinngormat naalagaaffiit oqaasissaqartitaminnut naalagaaffinni allani aallartitaqarfiat Nuummi ammarneqarpoq. Trumpip allaffeqarfiata taanna suliniutigivaa, taanna oqarpoq.
Donald Trumpili aqutsisunngorlunilu qinigaassappat nunatsinnut pingaartitsinera ineriartuinnassasoq, Jørgen Boassen oqarpoq.
- Allisarneqassasoq ilimanarpoq. Suleqatiginninneq anginerulertussaavoq. Ingammik Nuummi mittarfik ammarpat, takornariat allallu sorpassuit suleqatigiilertussaappata, siunissami amerikarmiut amerlanerit nunatsinnukartut isigilertussaavagut. Amerikarmiut tamakku angalasartut amerlanerpaartai ooriutilissuugamik.
