Donald Trumpip Harris oqalliseqatigeqqikkusunngikkaa

Donald Trump USA-mi præsidentimut novembarip ulluisa tallimaanni qinersisoqarnissaanut atatillugu oqallitsitsinermut peqataaqqinnavianngilaq.

Trump inoqatinut nammineq attaveqaqatigiittarfimmini Truth Socialimi ippassaq taama allappoq.

Republikanerit sinnerlugit qinigassanngortittoq unammillertaalu Kamala Harris, demokratiusoq, marlunngormat apeqqarissaarfigineqarlutillu oqallitsinneqarput.

- Pingajussaanik oqallittoqarnavianngilaq!, Trump, Truth Socialikkut allappoq, Harrisilu marlunngormat oqallikkamik ajugaanerarluni.

Marlunngormat oqallittoqareermat Trump tusagassiortunut sassarami oqallinnermik aqutsisut nutaarsiassaqartitsivimmit ABC-meersut naapertuilluanngitsuliornerarpai.

Naliliisartut Ipsosimeersut oqallitsitsisoqareernerup kingorna USA-mi inunnik isumasiuimmata kina oqallitsitsinermi ajugaanersoq apeqqutigaat, Trumpillu oqaasiinut allaanerusumik taakku inerniliipput.

Inuit aperineqartut marlunngornermilu oqallittoqarneranik malinnaasimasut akornanni 53 procentit oqaatigaat Harris ajugaasoq, 24 procentillu Trump ajugaasoq.

Harrisip qineqqusaarnermut allattoqarfiata marlunngornermi oqallittoqareernerani oqaatigaa Harris oqallinnernut allanut peqataarusuttoq. Trumpilli Harrisip oqallinnermi ajorsarneratut tamanna isigaa:

- Aningaasarsiutigalugu tilluuttartoq unamminermi ajorsarsimagaangami unammeqqittoqarnissaanik piumasaqartarpoq, Trump, inoqatinut attaveqaqatigiittarfimmini allappoq.

USA-mi inuit 67,1 millionit oqallinneq tv-kkut malinnaavigaat. Harris oqallinnermi angusarissaarnerusoq, politikkikkut naliliisartut amerlanerit kingorna oqaatigaat.