USA-mi præsidentimut tullersortaasimasup Dick Chenyp Kamala Harris tapersersoraa
USA-mi præsidentiusimasumut George W. Bushimut tullersortaasimasup Dick Cheneyp, demokratit sinnerlugit præsidentimut qinigassanngortitaq Kamala Harris tapersersorpaa.
- Nunatta ukiuni 248-ni oqaluttuarisaanerani inummik ataatsimik kunngiitsuuffitsinnut aatsaat taama ulorianartigisumik peqarpugut, Dick Cheney Donald Trump pillugu ilaatigut oqarpoq.
- Illuinnaasiortuunata nunatta tunngaviusumik inatsisaanik illersuinissatsinnik innuttaasutut pisussaatitaavugut. Tamanna pillugu Kamala Harris qinerniarpara, taanna oqarpoq.
Dick Cheney republikaneriuvoq, USA-milu 2001-imiit 2009-p tungaanut præsident George W. Bushimut tullersortaalluni.
Inunnik isumasiuinerit kingulliit takutippaat Kamala Harrisip Donald Trumpillu akornanni naligiittoqartoqartorujussuusoq.
Republikanerit amerlasuut Trump nuannarinngikkaat
Donald Trumpimut illuatungiliisut taassumallu republikanerinik aqutsineranik nuannarinninngitsut arlaliusut aamma takuneqarsinnaavoq.
Dick Cheneyop pania Æiz Cheney taakkununnga ilaavoq. Taanna republikanerit sinnerlugit innuttaasut sinnerlugt sinniisoqarfimmi, tassa Repræsentanternes Husimi 2023-p tungaanut ilaasortaavoq, soorlu aamma Mitt Romney taakkununnga ilaasoq. Taanna republikanerit sinnerlugit præsidentimut siornatigut sassarnikuuvoq, republikanerillu sinnerlugit naalagaaffimmi Utahmi senatoriulluni.
Liz Cheney Kamala Harris qinerniarlugu siusinnerusukkut nalunaarutiginikuuaa.
- Konservatiivitut, nunallu tunngaviusumik inatsisaanik pingaartitsisutut, qinersinissamut eqqarsaatersuuteqarluarsimavunga, taanna oqarpoq.
- Donald Trump taama itsillugu qinernavianngilara, Kamala Harris akerlianik qinerniarpara, Dick Cheney, USA-mi ilisimatusarfiit ilaanni Duke Universitymi oqalugiarluni ilaatigut oqarpoq.
Romney, USA-mi præsidentimut 2012-imi qinersinermi Barack Obamamut ajorsarpoq. Taanna Donald Trumpimik qinersiniarnerluni tusagassiortumit ukioq manna februaarimi pingasoriarluni aperineqarami naaggaarpoq.
- Naaggarluinnaq.
USA-mi præsidentimut ukioq manna novembarip ulluisa tallimaanni qinersisoqassaaq. Qinersinermi ajugaasoq præsidentitut aappaagu januaarip ulluisa 20-anni ivertinneqassaaq.
