Kamala Harrisip USA-mi demokratit præsidentinngorniutsitassaattut toqqagaanini akuerigaa
USA-mi demokratit USA-mi præsidentimut ukioq manna novembarip ulluisa tallimaanni qinersinissaannut qinigassanngortitassaattut toqqarneqarnini, Kamala Harrisip pisortatigoortumik unnuaq akueraa.
Partiip illoqarfissuarmi Chicagomi ataatsimeersuarneranni taama oqarpoq:
- Nunarsuarmi nunani pissaaneqarnerpaanni sinnerlusi qinigassanngortitassatut toqqarneqarnera akueraara, præsidentimut qinigassanngortittoq oqarpoq.
Præsidentimut qinersisoqarnissaanut republikanerit qinersisartuisa akornanni qinersinissamut atatillugu kina qinissanerlugu nalornissuteqartut Harrisip aamma kaammattuuteqarfigai.
- Inuit politikkikkut assigiinngitsunik isummersortartut unnummut isiginnaaqataasut nalunngilara.
- Unalu ilisimassagissi kissaatigaara: Amerikamiunut tamanut præsidentiunissara neriorsuutigissavara. Tatigiuaannarsinnaavarsinnga, partii salliutinnagu nunarput salliutittuassavara, Kamala Harris oqarpoq.
Harris oqaluttarfimmut sassarami inuit erfalasulisaartut nuannapput.
Harris oqalugialerami ataatsimeersuariaqataasut Harris sivisuumik tikilluaqquaat ersaartaallugulu, aatsaallu taamaalereermat præsidentimut qinigassanngortittoq 59-inik ukiulik oqalugialersinnaalerpoq.
Nammineq peroriartornini oqalugiarnermi aallarniutigaa, anaanamit kisimiittumit perorsarneqarnini nunamillu sullisserusussuseqarneq oqaluttuaralugu.
USA-mi politikkimut tunngasut oqalugiarnermini ilaatigut oqaluuserai, soorlu aamma ilaqutariit akunnattumik isertitallit akileraarnikinnerusalernissaannut siunnersuuteqalersaarnini, arnallu kinguaassiorsinnaanissamut pisinnaatitaaffii aamma eqqaagai.
