Trump republikanerit ilaannik toqumik sioorasaarisimanersoq pillugu misissuiffigineqalersoq

Republikanerit sinnerlugit præsidentimut qinigassanngortittoq Donald Trump, republikanerini nuimasut ilaat Liz Cheney pillugu oqaaseqarnermini inatsisinik unioqqutitsisimanersoq USA-mi naalagaaffimmi Arizonami misissuiffigineqaleruttorpoq.

Nutaarsiassaqartitsivik Reuters taama allaaserisaqarpoq.

Arizonap inatsiseqarnermut ministeria Kris Mayes, demokratiusoq, misissuisitsiniartuuvoq.

Trump tv-qarfiup Fox Newsip tusagassiortuanut Tucker Carlsonimut Arizonami sisamanngormi apersorneqarnermi Liz Cheney pillugu oqaaseqarpoq, oqaasiilu maanna misissuiffigineqalerput.

- Sorsukkumatuujuvoq ingasaassiniaq Trump oqarpoq.

Trump sisamanngormat apersorneqarluni Liz Cheney pillugu ima oqarpoq:

- Aallaasilisartunit qulingiluanit aallaaneqartussatut inissitsigu, tamannalu pillugu qanoq isumaqarnersoq takoriartigu, Donald Trump ilaatigut oqarpoq.

Nunanut allanut tunngatillugu politikkimi ingasaassiniaq sorsukkumatuutut ilaatigut isigineqartarpoq.

Liz Cheney, republikanerini talerperliunianeersoq Trumpimik isornartorsiuisut nuimanersaat ilagaat. Taassuma angutaa Dick Cheney George W. Buship præsidentiunerata nalaani præsidentimut tullersortaavoq. Bush præsidentiummat USA Afghanistanimi Irakimilu sakkutuuliivoq.

Trump toqumik sioorasaarisimanersoq Arizonap inatsiseqarnermut ministeriata maanna tassa misissornialerpaa.

Trump killiligaanani oqaaseqarasinnaatitaanini atorlugu oqaaseqarsimanersoq, inatsisinilluunniit unioqqutitsilluni sioorasaarisimanersoq suli paasinarsinngitsoq taassuma erseqqissaatigaa.

Liz Cheney nammineq sakktuujunikuunani amerikamiut sakkutuuinik sorsukkiartortitsiniartoq præsidentiusimasup qineqqusaarnermut ataatsimiititaliaani sulisut oqaatigaat.