Nunasisut inuarsimasut toqumik pillagaasarnissaannut Trump piareersimavoq
USA-mut nunasisunut assuarinninnini præsidentiusimasup Donald Trumpip tallimanngormat qinersisartunik ataatsimiisitsinermini sakkortuseqqippaa.
Tamanna pivoq naalagaaffeeqqani Coloradomi Nevadamilu qinersisartunik ataatsimiisitsinermini.
USA nunatut allamiunik inupilunnik tiguarneqarsimasutut Trumpip assersuukkaa nutaarsiassaqartitsiviup AFP-iip allaaseraa.
Nunasisup amerikkarmioq toquppagu toqumik pillaagaasarnissaanik isuma saqqummiuppaa. Taama allappoq nutaarsiassaqartitsivik Reuters.
- nunasisup amerikkarmiutut innuttaassusilik pinerluttaalisitsisorluunniit toquppagu kaammattuutigaara toqumik pillaasarneq eqqunneqassasoq, Trump Coloradomi oqarpoq.
Aurorami Coloradomi qinersisartunik ataatsimiisitsineq ingerlanneqarpoq. Trump aamma oqarpoq illoqarfiup ilaa nunasisunik inupilunnik peqatigiittunit aqunneqartoq.
Bidenip ingerlatsinerani pinerliiniarnerit ikiliartorput
Illoqarfiup oqartussaasuinit - soorlu borgmesterimit- taamatut oqaaseqarneq pisuusaarnertut ingasattajaarujussuarnerusorlu oqaatigineqartoq,Reuters allappoq.
- Aurora illoqarfiillu allat tiguagaaqqasut annaatissavakka.
- Inuit ajortut inatsisinillu unioqqutitsisut parnaarutissavakka nunatsinnilluunniit anisillugit Aurorami Donald Trump oqarpoq.
Tallimanngormat Aurorami qinersisartunik ataatsimiitsinermiit Nevadami Renomut qinersisartunik ataatsimiisitsiartorpoq.
Trumpip 2017-imiit 2021-ip tungaanut præsidentiunerani USA-mi sakkortuumik pinerliiniarnerit aatsaat taamak amerlatigipput. Maanna præsidentiusoq Joe Biden aquttuulermat ukiuni tulliuttuni pinerluttuliornerit ikiliartorput . Taama allappoq AFP.
Reuters allappoq misissuinerit takutikkaat nunasisut USA-mi inunngortuninngaanniit pinerliinerunngitsut.
Novemberip tallimaani USA-mi præsidentimut qinersisoqarnissaanut qineqqusaarnermini nunasisinut saassutarinninnini Donald Trumpip qitiutippaa.
Trump Republikanerit præsidentissatut sassartitaraat. Unammillerpaalu præsidentip tullersortaa Kamala Harris Demokratit sassartitaat.
