USA-mi naartuersissinnaanerup nuna tamakkerlugu inerteqqutaalernissaa Trumpip siunnersuutigilersaaraa

USA-mi naartuersissinnaanerup nuna tamakkerlugu inerteqqutaalernissaa, immikkullu ittumik aatsaat pisoqartillugu naartuersittoqarsinnaanissaa Donald Trumpip tapersersorpaa.

Republikanerit sinnerlugit præsidentimut ukioq manna novembarimi qinersinissami sassartinneqartussaagunartoq, tv-qarfimmit Fox Newsimit apersorneqarluni sapaammi taama oqarpoq.

Naartulernermiit sapaatit akunnialunnguit qaangiunneranni naartuersissinnaanerup inerteqqutaalernissaa Trumpip siunnersuutigaa, sapaatilli akunneri qassit ingerlareerneranni inerteqqutaalissanersoq itinerusumik oqaaseqarfiginngilaa.

Naartulernermiit sapaatit akunneri qassit qaangiunneranni naartuersissinnaanerup inerteqqutaalernissaanut siunnersuutini piffissami qaninnermi saqqummiukkumaarlugu præsidentiusimasup oqaatigaa.

Aviisip The New York Timesip februaarimi allaaserisaa aallaavigalugu Trump aperineqarami, naartuersissinnaanerup nuna tamakkerlugu inerteqqutaalernissaanut siunnersuuteqalersaarnini Trumpip saqqummiuppaa.

Naartulernermiit sapaatit akunneri 16-it ingerlareerneranni naartuersissinnaanerup inerteqqutaalernissaa tapersersorlugu Trumpip siunnersortiminut oqaatigisimagaa The New York Timesip taamanikkut allaaseraa.

Assersuutigaluguli pinngitsaalineqarnermi naartulersimagaanni, qanigivallaakkamilluunniit naartulersinneqarsimagaanni, naartunerluunniit anaanaasup inuuneranut ulorianartorsiortitsippat naartuersittoqarsinnaanissaa Trumpip tapersersorpaa.

- Innersuussutima akuerineqarnissaa naatsorsuutigaara, Trump oqarpoq.

Ilanngullugu oqaatigaa, nammineq præsidentiugallarami USA-p eqqartuussiviisa qullersaata ilaasortassaanik pingasunik toqqaasimalluni, taakkulu naartuersittarnermut eqqartuussiviup isumaa talerpimmut sangutissimagaat. (Naartuersittarnerup ajornarnerulernissaanut, aaqq.)

USA-mi arnat killilersorneqaratik naartuersissinnaatitaanerannik USA-p Eqqartuussiviisa Qullersaata, eqqartuussineq´Roe v Wade´-imik taasaq akuersilluni1973-imi aalajangeriigaq juuni 2022-mi atortussaajunnaarsippaa.

Aalajangiinerup kingorna USA-mi nunap immikkoortuini naartuersittarneq pillugu namminneq inatsisiliorsinnaalerput.

Maannamut nunap immikkoortuini arlalinni, soorlu Floridami naartuersissinnaatitaanermik killilersuinermik inatsisissatut siunnersuut akuerineqareerpoq. Nunalli immikkoortuini arlalinni, soorlu Marylandimi arnat killilersorneqaratik naartuersissinnaatitaanerat aalajangiusimaannarneqarpoq.

Maanna præsidentiusoq Biden Demokratillu naartuersissinnaanermut apeqqut iluminni oqallisigisaqaat.

Partiimi nuimanerit oqaatigisaannarpaat misissuinerit takutikkaat amerikamiut amerlanersaasa nuna tamakkerlugu inerteqquteqalernissaq akerlerigaat. Trump sapaammi oqamisaarpoq, sammisaq taanna saqqummiuteqqikkamiuk soorunami politikkikkut aalassannartoqarsinnaasoq.

- Misigivungali, inerteqquteqaraluartoq kikkut naartuersissinnaanerannik taasakka pingasut atuuttariaqartut, oqarpoq.

- Nalunngeqatiginnissuseq nammineq malittariaqarpoq. Kisianni aamma qinersisoqartussaavoq. Taakku pingasut akuerinngikkaanni soorlu qinerneqarnissaq ajornakusuussaqisoq, oqarpoq.