North Dakotami naartuarsaaliinnartut innimiilliorfigineqarsimagaluarpataluunniit peersitseqqusaajunnaassasut
![](/sites/default/files/styles/image_934x467/public/2023-04/20230414-071738-L-3000x2000ma.jpg?itok=UWxSsM6U)
North Dakotami guvernøri republikaneriusoq tassa kunngitsuunermik tapersersuisoq Doug Burgumimik atilik inatsimmik atsiorpoq, atsiugaalu tassaavoq naartusoq sapaatip akunnerini arfinilinni naartoreersimaguni peersitsissanngitsoq, qanorluunniit arnaq pinngitsaalineqarsimalluni naartulersimagaluarpat tamannaluunniit kannguttaatsuliorfigineqarsimanermit aallaaveqaraluarpat.
Nutaarsiassaqartitsivik AP taama allaaserisaqarpoq.
Guvernørilu taanna oqarsimavoq inatsisip taassuma ersersissagaa, najugartik North Dakota tassaasoq peersitsineq pillugu akerliusinnaassusilik.
Erseqqissaatigineqarporlu inatsit pineqartoq erngertumik atuutilissasoq.
Inatsimmut illersuisut oqarput, inatsit inuup inuuneranik illersuisuusoq, akerliusullu aarlerisaaripput, tamanna arnanut nivissanullu sakkortuumik kingunerluutaasinnaasoq.
Amerikami peersitsisinnaaneq 1973-mili tassa ukiuni 50-ni atuuppoq, Amerikamili sumiiffiit ilaanni kingullertigut ammaanneqarpoq peersitsisinnaaneq inerteqqutigineqarsinnaasoq imaluunniit killilimmik peersitsineq atortinneqarsinnaasoq, taamaaliorsinnaatitaanerlu Amerikap ilaani sumiiffiit ilaasa maanna atorlualerpaat.