Naartulernermiit sapaatip akunnialuit qaangiutsinnagit naartuersissinnaaneq Floridami inerteqqutaalertoq

Floridap guvernøriata, Ron DeSantisip politikkikkut ajutoorutigeriaannaagaluarlugu naartulernermiit sapaatit akunnialuit qaangiukkaangata naartuersittoqarsinnaajunnaarnissaa pillugu inatsisissatut siunnersuut akerlerfiissiusaqisoq atsiorpaa.

Allattoq Ritzau

apriilip 14-at 2023 09:51

Nutserisoq Apollo Jeremiassen

Naartulernermiit sapaatip akunneri arfinillit qaangiutsinnagit naartuersittoqarsinnaajunnaarnissaa pillugu inatsisissatut siunnersuut, USA-mi naalagaaffiup Floridap guvernøriata, Ron DeSantisip, atuutilersutut ippassaq sisamanngornermi atsioraa, nutaarsiassaqartitsivik NBC News allappoq.

Inatsisip atuutilernissaa isertuunneqarsimasoq USA-mi ippassaq sisamanngornermi unnukkut aqqaninngortorlu aatsaat nalunaarutigineqartoq, NBC News aamma allappoq.

Aamma atuarukBidenip itigartitsisinnaatitaanini atorniaraa

Naartuersittarnernut tunngasup akerleriiffiusaqisullu inatsisaata allanngortinneqarnera Floridami Repræsentanternes Husimi republikanerinit amerlanerussuteqarfiusumi akuersissutigineqareersorlu nalunaaquttap akunneri arlalialuit qaangiuttut tamanna aatsaat nalunaarutigineqarluni.

Inatsisissatut allannguut tamanna Floridami Repræsentanternes Husimi ilaasortanit 70-init isumaqatigineqartoq 40-t akerliusut, nutaarsiassaqartitsivik Reuters allappoq.

Aamma atuarukTrump eqqartuussivimmut sassartinneqaleraluarluni tapersersorteqarnerulertoq

Inatsimmi nutaami allassimavoq, pinngitsaalineqarsimallutik naartulersimasut, ilaqutariit akornanni atoqatigiinnerup kingorna naartulersimasut aamma naartusup inuunera navianartorsiortinneqarpat naartuersittarneq aatsaat pisinnaasoq.

USA-mi naalagaaffinni nunap kujasissuaniittuni amerlanerni naartuersittarnerit inerteqqutaapput. Tamannalu pillugu arnat naartuersinniarlutik Floridaliartarput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.