Trump eqqartuussivimmut sassartinneqaleraluarluni tapersersorteqarnerulertoq

Naak USA-p præsidenterisimasaa Donald Trump eqqartuussivimmut marlunngornermi sassartinneqartussaagaluartoq, republikanerit akornanni tapersersorteqarluartuarsinnarpoq.

Inunnik isumasiuisartut Ipsosip republikanerit akornanni isumasiuinerata tamanna takutippaa.

Donald Trump pornonik filmiliaritittartumut, Stormy Danielsimut, nipangersaalluni aningaasanik akiliisimasutut ilaatigut pasineqarluni eqqartuussivimmut sassartinneqarniarpoq, eqqartuussivimmullu sassartinneqarnissaa ilisimaneqaleqqammersoq Ipsos republikanerinik isumasiuisimalluni. Stormy Daniels Trumpimik ilaqarsimanerarpoq.

Inuit republikanerinik tapersersuisutut taasut akornanni 48 procentit Donald Trumpip præsidentimut aappaagu qinersinissami piukkunnerugitsik, isumasiuinermi nutaami erserpoq.

Marsimi kingullermik isumasiuisoqarneranut naleqqiullugu 4 procentpointinik tamanna amerleriarneruvoq, taamanikkummi 44 procentit Trump tapersersoraat isumasiuinerup takutimmagu.

USA-mi præsidentimut aappaagu novembarimi qinersisoqartussaavoq. Republikanerit demokratillu qinersinissamut sassartitassaminnik tamanna sioqqullugu toqqaaqqaassapput.