Trump nipangersaalluni aningaasanik akiliisimasutut eqqartuussivimmit pisuutinneqartoq

USA-p præsidenterisimasaa Donald Trump nipangersaalluni aningaasanik arnamut pornoni isiginnaartitsisartumut Stormy Danielsimut akiliisimasutut eqqartuussivimmit pisuutinneqarpoq.

Nutaarsiassaqartitsiviit Reuters AFP-lu taama allaaserisaqarput.

Donald Trump, USA-mi præsidentiusimasuni siullersaalluni pinerluuteqarsimasutut unnerluutigineqartuni eqqartuunneqarpoq.

- Eqqartuussineq ilumuunngilaq qiissaarnaannarlunilu. Innuttaasut ilumoortumik novembarip ulluisa tallimaanni aalajangerumaarput. Maani qanoq pisoqarnersoq nalunngilaat, Donald Trump, eqqartuussivimmi aalajangertoqareersorlu oqarpoq. Nutaarsiassaqartitsivik AFP taama allaaserisaqarpoq.

USA-mi præsidentimut 2016-imi qinersisoqalernerani pornoni filmiliaritittartumut Stormy Danielsimut nipangersaalluni 130.000 dollarinik, imaluunniit 900.000 koruunit missaannik akiliisimasutut Trump unnerluutigineqarpoq, akiliinermilu peqquserluttuliorsimasutut pasineqarluni.

Aningaasat nuutsinneqarmata eqqartuussissuserisumut aningasartuutitut isikkoqartinniarneqarsimapput, Stormy Danielsip Trumpillu 2006-imi sammisimanerat avammut tusarliunneqannginnissaa siunertaasimalluni.

Trump suli præsidentinngorniarsinnaasoq

Imaanngilarli Trump eqqartuussinermi aalajangiiniartitat aalajangiinerat pissutigalugu præsidentinngorniarnermi novembarip ulluisa tallimaanni sassarsinnaatitaassanngitsoq.

Trump eqqartuussinermi pisuutinnerpat, eqqartuussinermi aalajangiiniartitat tamarmiullutik isumaqatigiinnissaat piumasaqaataavoq. Donald Trump pinngitsuunerarpoq, eqqartuussiviullu aalajangiinera suliareqqitassanngortissagaa ilimagineqarluni.

Siornatigut præsidentiusimasoq eqqartuussivitsigut suliarisassani sisamani sassartinneqartussaavoq, nipangersaallunili akiliisimanermut unnerluutigineqarluni eqqartuussivitsitsigut suliaq præsidentimut qinersisoqartinnagu taamaallaat suliarineqartussaavoq.