Trump allagaatinik isertuussanik toqqortaateqarsimasutut pasisaalluni unnerluussaasoq

USA-p præsidenterisimasaa naalagaaffimmi isumannaallisaaneq pillugu allagaatinik angerlarsimaffimminiititaqarsimasutut pasisaalluni unnerluussaavoq.
Eqqartuussivilersuussineq, amerikamiut inatsiseqarnermut ministeriaqarfianit aallartinneqartoq, Trumpimut aammaarluni kinguariarneruvoq, tassami Trump republikanerit sinnerlguit 2024-mi præsidentimut qinersinissamut sassarpoq. Assi © : Andy Buchanan/AFP/Ritzau Scanpix
Allattoq Ritzau
juunip 09-at 2023 10:26
Nutserisoq Apollo Jeremiassen

USA-mi allagaatinik isertugaasunik USA-p præsidentierisimasaata, Donald Trumpip, passussisimanerata paasiniarneqarnerani taanna unnerluunneqaqqippoq.

Trump nammineerluni attaveqaqatigiiffimmi, Truth Socialiami, taama allappoq, tamannalu illersuisuata, Jim Trustyp, aamma uppernarsarlugu.

Trump pisunik assigiinngitsunik arfineq-marlunnik unioqqutitsisimasutut eqqartuunneqartussaasoq, suliamut paasisimasaqartumit kinaanerminilli isertuussisumit nutaarsiassaqartitsivimmut Reutersimut oqaluttuarpoq.

Trumpimut unnerluussinerit tamanut suli takusassiarineqanngillat, nutaarsiassaqartitsivillu Reuters naapertorlugu Trumpip pisuutinneqarnerannut tunngasut illersuisuinit aamma suli takuneqarnatik.

Eqqartuussivilersuussineq, amerikamiut inatsiseqarnermut ministeriaqarfianit aallartinneqartoq, Trumpimut aammaarluni kinguariarneruvoq, tassami Trump republikanerit sinnerlguit 2024-mi præsidentimut qinersinissamut sassarpoq.

Trumpip attaveqaqatigiiffimmut, Truth Socialiamut, nammineerluni allannermini aamma oqaatigaa, unnerluussinerit isertugaatinik passussisimanerminut tunngassuteqartuusimassasut.