USA-mi præsidentimut tullersortaasimasut allagaatinik isertuussaateqarnerlutik misissueqquneqartut

USA-mi præsidentiusimasut, præsidentimullu tullersortaasimasut, allagaatinik isertuussanik tigummiaqarnerlutik misissussagaat, USA-mi naalagaaffiup allattugaateqarfiata kaammattuutigaa.

Allagaatit isertuussat siornatigut præsidentiusimasup Donald Trumpip najugarisaani, præsidentimullu tullersortaasimasup Mike Pencep najugarisaani, maannalu præsidentip Joe Bidenip najugarisaani nassaarineqareersullu, USA-mi naalagaaffiup allagaateqarfia taama kaammattuuteqarpoq.

Nutaarsiassaqartitsivik CNN taama allaaserisaqarpoq.

Allagaatit isertukkat kingullermik nassaarineqartut, Donald Trumpip præsidentiutilluni tullersortaata Mike Pencep najugarisaani nassaarineqarput.

AAMMA ATUARUK Trumpip allagaatit isertuussat nammineq pigisami akornanniitissimagai

CNN naapertorlugu allagaatit isertukkat Mike Pencep nammineq eqqartuussissuserisuanit nassaarineqarput.

Maanna præsidentip Joe Bidenip præsidentip tullersortaanerani allagaatit isertuussat arlallit naalagaaffimmi Delawaremi najugarisaani qanittukkut nassaarineqarput.

Allagaatit isertuussat siulliit isummersuisit Bidenimut attuumassutilinniittut nassaarineqarput. Allagaatit isertuussat allat Bidenip Delawaremi najugarisaani kingorna nassaarineqarput.

Allagaatit isertuussat Donald Trumpip Floridami najugarisaani aamma nassaarineqarnikuupput.

Allagaatit isertuussat Donald Trumpip sulinngiffeqartilluni Floridami ornittagaani, maannalu aamma najugarisaani Mar-a-Lagomi tigummineqartut paasineqarnikuuvoq. Allagaatit pineqartut Trumpip præsidentip illorsuanit 2021-mi januaarimi qimagunneraneersuupput.