Trumpip allagaatit isertuussat nammineq pigisami akornanniitissimagai

USA-mi præsidentiusimasup Donald Trumpip naalagaaffiup allagaatai isertuussat nammineq pigisami karsit akornanniitissimavai.

Karsit 33-t allagaatinik isertuussassanik imallit naalagaaffiup politiivisa FBI-t aggustip arfineq pingajuani Trumpip Floridami angerlarsimaffianik misissuinerminni arsaarinnissutigaat.

Karsit 33-t imarisaasa suuneri USA-mi inatsiseqarnermut ministereqarfimmit sukumiinerusumik ullumi tallimanngornermi saqqummiunneqarput.

Arsaarinnissutigineqarsimasut ilaatigut tassaapput mappit 43-t isertuulluinnagassatut nalunaaqutsigaasut imaqanngitsulli.

Taakkua saniatigut mappit allat 28-t præsidentip illersornissaq pillugu siunnersortaanut utertinneqarsimasussaagaluit imaqanngitsut nassaarineqarput.

Mappit imarisaat sumut pisimanersut ilisimaneqanngilaq.

AAMMA ATUARUK Donald Trumpip FBI-kkut allagaatinik arsaarinnissutinik misissuisinnaanngikkallartinniarai

Mappit imaqangitsut saniatigut allakkiat pingasut isertuussassat allakkiallu allat arfineq marluk isertuulluinnagassaasut aamma arsaarinnissutigineqarput.

Allakkat pingajorarterutaat Trumpip angerlarsimaffimmini allaffiani nassaarineqarput.

Allakkat isertuussassat saniatigut karsit allat paasissutissanik isertuussassanik, aviisinik qiortakkanik, atisanik, assinik tunissutisianillu imallit nassaarineqarput.

USA-mi præsidentiusup præsidentiujunnaaraangami allakkat paasissutissat emailikkullu allakkat USA-mi toqqorsivimmut inatsit malillugit tunniuttussaavai.

Taamammat Trump inatsisinik unioqqutitsisimanersoq USA-mi inatseqarnermut ministereqarfimmit maanna misissuiffigineqarpoq.

Trump nammineq oqarpoq præsidentiugallarami allakkanik pineqartunik isertuussisussaatitaaneq atorunnaarsissimagamiuk taamaalilluni inatsisinik unioqqutitsisimanani.