Donald Trumpip FBI-kkut allagaatinik arsaarinnissutinik misissuisinnaanngikkallartinniarai

USA-mi naalagaaffiup politiivi, FBI, USA-mi præsidentiusimasup Donald Trumpip Floridami najugaqarfianut pakasaallutik qaammatip massuma aallartisimalaarnerani misissuinerminni allagaatinik arsaarinnipput. Allagaatilli pineqartut sukumiinerusumik misissuiffigineqarsinnaanngikkallarnissaat, Trumpip eqqartuussivitsigut maanna sulissutiginialerpaa.

FBI-kkummi allagaatinik misissuissappata immikkut ittumik atorfilittamik nakkutigineqarlutik aatsaat taamaaliorsinnaasut, Trumpip kissaatigaa.

AAMMA ATUARUK Joe Biden USA-mi præsidentitut ivertinneqartoq

Allagaatit suut Trumpip Floridami Mar-a-Lagomi najugaqarfianit aggustip ulluisa arfineq-pingajuani peerneqarnersut USA-p inatsiseqarnermut ministereqarfianit saqqummiunneqarnissaa, Trumpip taassuma saniatigut piumasaraa.

Donald Trump eqqartuussivinnit USA-milu naalagaaffinnit arlalinnit misissuiffigineqaleruttorpoq, Mar-a-Lagomilu misissuineq taakkununnga ilaalluni, Trumpip præsidentiunermini suliffeqarfiuteqarneranilu pasilliutit misissorneqaleruttorlutik.

Trump 2021-mi januaarimi præsidentiujunnaarami allagaatinik isertuussanik imaqarsinnaasunik tigusaqarsimasutut pasineqarluni FBI-mit misissuiffigineqarpoq.