Joe Biden USA-mi præsidentitut ivertinneqartoq
Joe Biden USA-mi præsidentimut ivertinneqarsimasut 46-ssaraat. Taassuma Donald Trump præsidentitut taarserpaa.
78-inik ukiulik demoraatineersoq sakkutuuiarneq Eqqartuussiviit qullersaani eqqartuussisut pisortaanit, John Robertsimit ivertinneqarpoq. Tamatuma kingorna præsidentinngortoq – erseqqarissumik attortisimasoq – inissaminut sivikitsumik ingippoq, nikuillunilu oqalugiariartorpoq.
AAMMA ATUARUK Bidenip USA silap pissusia pillugu isumaqatigiissummut WHO-mullu ilannguteqqilertorusukkaa
Oqalugiarnermini ikinngutinnersumik nipeqarluni amerikamiut imminut qinersisimanngitsut præsidentitut periarfissiinissaanik qinnuigai.
- Unammillernartut qaangernissaat aamma tarnip pilerseqqinnissaa Amerikallu siunissaa oqaasiinnaanngitsunik allarpassuarnik pisariaqartitsiviupput. Pingaarnerpaamik tamat oqartussaaqataanerat pisariaqarpoq: katersuunneq, Biden oqarpoq.
Sakkutuut 25.000-it sulisinneqartut
Washington D.C-mi pingasunngornermi ivertitsisoqarnera præsidentinngortitsinernit allanit allaaneruvoq, tassa tamat ivertitsinermut malinnaajartorsinnaanngillat.
Tamanna siullertut coronap nunarsuaq tamakkerlugu tunillaasuunneranik pissuteqarpoq. Aammali sillimaniarneq inuppassuit kamassimasut, Kongressimut sapaatit akunneri marluk matuma siorna saassussisoqarnerisa kingunerisaanik aaqqissuussinermi annertusineqangaatsiarneranik pissuteqarpoq.
AAMMA ATUARUK Trumpimut illersuisut Kongressimut isaasut: Illorsuaq isumannaarneqartoq
Eqimattallu talerperliunerusunut tapersersuisut Bidenip pingasunngornermi ivertinneqarnissaanik taamaatitsisitsiniarluta aamma siorasaarinikuupput.
Kongressip illorsuata ivertitsisoqarfiusup eqqaani sillimaniarneq pillugu sakkutuut 25.000-init amerlanerusut sulisinneqarput.
Trump Floridamiittoq
Isiginnaartut misissuisullu aalajangersimasumik aarlerinartumik takusaqarsimanatik oqaatigigaat nutaarsiassaqartitsiviup, Reutersip allaaseraa. Eqimattanilli sakkutuunit aarlerinartoqarnera suli ernumanarpoq.
Præsidentimut tullersortaasimasoq, Mike Pence aamma republikanerit demokraatillu Kongressimi ilaasortat ivertitsisoqarnerani najuupput.
Bidenimit siulliullutik præsidentiusimasut qassiusut aamma najuupput. Barack Obama, Bill Clinton aamma Georg W. Bush peqataasunut ilaapput.
Præsidentiusimasoq, Jimmy Carter 96-inik ukiulik coronap tunillaassuunnera pissutigalugu qaaqquneqarnerminut qujaannarsimavoq.
Donald Trumpip Washington D.C-mi pingasunngornermi ivertitsisoqarnera peqataaffiginngilaa. Taanna Bidenip ivertinneqarnissaanut akunnerit pingasuinnanngortut Air Force Onemut ilaalluni Floridami Mar-A-lagominukarpoq.
Amerikamiut præsidenterisimasaanik ukiuni 150-ni ivertitsisoqartarnerani aatsaat siullermeertumik paarlanneqartumik najuuttoqanngilaq.