Inuit nunami nunarsuarmi pissaaneqarnerpaasumiittut aqagu qinersissapput, tamannalu ilinnut sunniuteqassaaq
USA-mi qinersisartut millionilippassuit aqagu ullaakkut qinersiviliaatitissapput, USA-mi præsidentiusariaqartutut isigisartik qineriartorlugu.
Kinaluunniit qinigaagaluarpat, qinersineq nunatsinnut soqutiginartuusoq, Ilisimatusarfimmi Lektoriullunilu immikkoortortaqarfimmi Nasiffimmi - nunanut allanut sillimaniarnermullu tunngasuni ilisimatusarfimmi pisortaq, Rasmus Leander Nielsen oqarpoq.
- USA nunarsuarmi suli pissaaneqarnerpaavoq. Issittumi eqqissiviilliortoqalissangaluarpat, taakkuupput nunatta isumannaatsuunissaanik isumaginnittussat- Issittumi Sakkutooqarfiunngitsoq uagulluunniit piniartortarinngisagut. Kinaluunniit qinerneqaraluarpat taamaassaaq, taanna oqarpoq.
USA-mi maannakkut præsidentiusoq, Joe Biden, qinigassaanngitsoq nalunngilarput. Demokratineersoq Kamala Harris republikanerineersorluunniit Donald Trump, qinersisartunit qinerneqassanersoq apeqqutaaginnarpoq. Kina qinerneqarnersoq siusinnerpaamik pingasunngornermi paasissavarput.
Donald Trump ajugaassappat
Trump eqqarsaatigineqartillugu præsidentiusimasup Nunatta pisiarinissaanik siunnersuutaa amerlasuut eqqarsaataanni siulliusarpoq.
Taamaattumik Donald Trump qinigaaqqissagaluaruni nunatta pisiarinissaanik neqerooruteqaqqissanersoq apereqqajaanarpoq?
Naak Trumpip qanoq iliussaneranik eqqoriaruminaatsuugaluaqisoq, taama pisoqaqqinnissaa Rasmus Leander Nielsenip ilimaginngilaa.
Imaanngilarli USA-p nunatsinnut qaninnerusumik attaveqarnissani soqutigiunnaarsimagaa.
- USA-p Nunatsinnut qanoq attaveqarnissaa, taavalu USA-p Danmark assigiinngitsutigut taarsersinnaagaa, oqallissutaalersinnaavoq, tamakkuali maannakkumut eqqoriaaanerinnaagallarput, Rasmus Leander oqarpoq.
Taanna atuagassiamut saqqummeqqammertumut The National Interestimut innersuussivoq, tassani Nunatta Danmarki free associationimut isumaqatigiissusioqatiginagu, USA isumaqatigiissuteqarfigissagaa Trumpip atorfilittarrisimasai pingasut siunnersuuteqarmata.
Eqqarsaatigineqartoq naatsumik nassuiassagaanni, USA-p nunarput illersornermik aningaasatigullu tapersissavaa, nunattali USA-miut aatsitassarsiorsinnaalersissavai USA-lu nunatta oqartussaaffiani tamarmi sakkutooqarnikkut oqartussaatilerlugu.
Kamala Harris ajugaassappat
Demokraatit pissaaneqaannassappata Kamala Harris arnani siullersaalluni præsidentip illorsuani 'The White House'mi allaffimmi issiasussanngussaaq.
Donald Trumpip iliuusissai eqqoriaruminaassinnaasut akerlianik Kamala Harris naalagaaffiup allanut attaveqarluarnissaa suleqatigiinnerlu ersarissumik anguniassavai.Tamanna nunatsinnut iluaqutaasinnaavoq, nunarsuarmi tamarmi pissutsit aalaakkaasuunerulersinnaammata.
- Naalagaaffeeqqanut, soorlu Naalagaaffimmut Danmarkimut Nunatsinnullu, nunanik tamalaanik, soorlu NATO-mik Issittumilu Siunnersoqatigiinnik suleqateqarnissaq pingaartuuvoq. Harrisip niuernermut politikki ammanerusumik ingerlatissajunnarsivaa. Nunatsinnullu aalisakkanik avammut niuerluartuusumut tamanna iluaqutaassaaq, Rasmus Leander Nielsen oqarpoq.
Kinaluunniit qinigaassagaluarpat nunarput illersornissaq pillugu eqqasuuteqartariaqanngilaq. Nunarsuarmimi qeqertani annersaat amerikarmiunut pingaartuuvoq.
- Qinersinerup inernera nunatsinni sillimaniarneq pillugu sunniuteqangaarnavianngilaq, Leander eqqissisaavoq.
Amerikami præsidentimut qinersineq soqutigigaanni Ilinniartut peqatigiiffiup ILI ILIp Nasiffiullu aaqqissuussaat Ilimmarfimmi kantiinami oqallinneq aqagu nalunaaqutaq 16-18 najorneqarsinnaaavoq.
