Múte B. Egede eqqissisaavoq: Kalaallit Nunaat kalaallit pigaat

- Uteqqillara - Kalaallit Nunaat kalaallit pigaat. Inuiattut siunissarput naalagaafinngornissarpullu, uagut nammineq ilutsinni suliassaraarput.

Naalakkersuisut siulittaasuat, Múte B. Egede (IA) Facebookikkut allappoq.

Nangipporlu:

- Danskit, amerikamiut allarpassuillu isumaqarsinnaapput, uisakajaartunulli sunnertinnata, nammineerluta allanillu tikkuartuigata isumatusaartumik siunissarput pillugu aalajangiissaagut. Inuiattut pisinnaatitaaffigut pisussaaffigullu atorlugit ingerlarsussaagut, sapinngilagut aamma suleqateqarluta.

KNR-ip Múte B. Egede apersorniarsimagaluarpaa, tamannali periarfissaanani.

Amerikamilu præsidentinngortussaq, Donald Trump inoqutinut attaveqaatikkut Social Truthikkut allatut oqariartuuteqarpoq:

- Taakku aamma nunarsuaq killilersugaanngitsoq, isumannaannermik, toqqissisimanermik, pissaanermik eqqissinermillu pisariaqartitsipput. Isumaqatigiissut tamanna isumaqatigiissutigineqassaaq, Donald Trump allappoq.

Isumaqatigiissut suna Donald Trumpip innersuussutigineraa ersarinngilaq, taassumali Kalaallit Nunaannik piginnittuunerup qulakkeernissaa kissaatigalugu siusinnerusukkut oqaatigaa. Taanna 2019-imi taama oqariartuuteqarpoq, aamma decembarip qaammataani.

Donald Trump Juniori Nuummut tikikkami takornariartut maaniilluni oqarpoq, amerikallu Kalaallit Nunaannut soqutiginninneranut atatillugu oqaaseqarumanngilaq.

- Uanga tassunga oqaaseqarsinnaanngilanga. Allat tassunga tunngatillugu oqaaseqassapput, taanna oqarpoq.