Tusagassiuutit: J.D. Vancep nulia nunatsinnukalersoq
USA-mi arnat sallersaasa tullia, Usha Vance Nuummukarlunilu Sisimiunukassasoq Sermitsiap ullumi saqqummiuppaa.
Tusagassiuut naapertorlugu Usha Vance amerikamiut præsidentiata tullersortaanut, J.D. Vance katisimavaa, taassumalu ileqquusumik qimussimik sukkaniuttoqarnera Avannaata Qimussersua sapaatip akunnerata tulliani aaqqissuunneqartussaq malinnaavigissavaa.
Nuliaasorli Sisimiunukannginnermini Nuummukaqqaassaaq. Tamannali pisortatigoortumik tikeraarnerunngitsoq inuttulli nammineq angalanerigaa, Sermitsiaq allappoq.
Donald Trump Jr.-ip illoqarfiit pingaarnersaannut januaarimi tikeraarnera aamma taamaappoq. Taannalu takornariartut tikeraarluni, præsidentip ernera Nuummi mittarfimmit anillakkami oqarpoq.
Kissaateqangaatsiartoq
Donald Trumpip nunarput soqutigingaatsiarlugu siorna decembarimi takussuserpaa. Taassuma tiguaasoqarsinnaanera kingullermik nalunaarutigaa.
Donald Trump Jr. januaarimi tikeraarami pisortatigoortumik sinniisunik naapitaqanngilaq, Usha Vancelu aamma naapitaqarnavianngitsoq, Sermitsiaq allappoq.
Aningaasanik tapiissuteqarneq
Kalaallit Nunaanni Qimussertartut Kattuffiata, KNQK-p, Avannaata Qimussersuanik aaqqissuussisup arnamit Danmarkimi najugaqartumit aningaasannassimallutik marsip aallartinnerani Facebookikkut nalunaarutigaa. Taakkuli aningaasanik suminngaanniilluunniit tunineqarsinnaallutik aamma allappaat.
Qimussertoqarnissaa Nuummi amerikamiut sinniisoqarfiata ikiuunneratigut USA-mit aningaasaliiffigineqarsimasoq Sermitsiap maanna oqaatigaa.
Borgmesterip naapissanngikkaa
KNR-ip Qeqqata Kommuniani borgmesteri, Malik Berthelsen arfininngornermi ualikkut oqaloqatigaa, taassuma Usha Vancep kommunimik naapitserusunnera pissutigalugu amerikamiut sinniissoqarfiata kommuni tallimanngornermi attavigineqarsimasoq oqaatigaa.
- Inussiarnersumik ilisimatippagut massakkut qineqqusaarneq ingerlammat qinersiliivikkattalu taanna naapinneqarnissaa pissusissamisuunngimmat taamaammat inussiarnersumik oqarfigivagut.
- Suli naapikkusuppagit taava qinersereernerup kingorna napinneqarutta pitsaanerusoq, Malik Berthelsen oqarpoq.
Borgmesterip amerikamiut sinniisoqarfia tusarfigeqqissimanagu oqaatigaa. Kisianni Usha Vancep kommunimik naapitsinissaanut tassa pilersaaruteqartoqanngilaq.
