USA-mi ministeri isumannaallisaanermullu siunnersorti nunatsinnukassapput
USA-p isumannaallisaanermut siunnersortaa Mike Waltz, USA-llu nukissiuuteqarnermut ministeria Chris Wright, USA-p præsidentiata tullersortaata J.D. Vancep nuliata Usha Vancep nunatsinnut tikeraarnissaanut peqataassapput.
USA-p præsidentiata illorsua taama ilisimatitsisoq nutaarsiassaqartitsiviup Reutersip allaaseraa.
Præsidentip tullersortaata nuliata ernini ilagalugu, atorfilittanillu allanik USA-meersunik peqateqarluni nunatsinnut sapaatit akunnerata massuma ingerlanerani sisamanngornermit arfininngornerup tungaanut tikeraarnissaa sapaammi nalunaarutigineqareersorlu taama nalunaaruteqartoqarpoq.
Usha Vancep kikkut angalaqatiginiarnerai sukumiinerusumik tassani nalunaarutigineqanngilaq.
USA-lli naalagaaffiata isumannaallisaaniarnermut siunnersortaa Mike Waltz, USA-llu nukissiuuteqarnermut ministeria Chris Wright Pituffik Space Basemut tikeraassasut ippassaq unnukkut nalunaarutigineqarpoq.
Amerikamiut Pituffik Space Basemiititaasa Waltzimut Wrightimullu paasissutissiissuteqarnissaat pilersaarutaasoq præsidentip illorsuata nalunaarutigaa.
Isumannaallisaanermut siunnersorti nukissiuuteqarnermullu ministeri, præsidentip tullersortaata nuliata Usha Vancep Avannaata Qimussersuanik malinnaaneranut aamma peqataassapput.
Usha Vancep amerikamiut nunatsinnut tikeraarneranni siuttuussasoq nalunaarutigineqarpoq.
USA-p præsidentiata Donald Trumpip Kalaallit Nunaata USA-mut ilanngunneqartariaqarneranik arlaleriarluni oqaatigisareeraalu USA-mit maanna aamma tikeraartoqalerpoq.
Det Hvide Hus: Suleqatigiinnissamut periarfissaq annertusarpoq
Nunatsinni politikerit inatsisartunut marsip ulluisa aqqarnanni qinersisoqareernerata kingorna naalakkersuisoqatigiiliuleruttortut arlallit taama tikeraartoqarniarnera isornartorsiorpaat.
Amerikamiut tikeraartut naalakkersuisunit ataatsimeeqatigineqarnavianngitsut, naalakkersuisut siulittaasorigallagaata Múte Bourup Egedep Facebookikkut ataasinngornermut unnuaani nalunaarutigaa.
- Ersarissumillu Amerikarmiunut oqariartuutigineqarnikuuvoq, nunatsinni qinersinerup kingorna suli Naalakkersuisunngortitsisoqanngimmat aatsaat Naalakkersuisut nutaat ivertinneqarpata oqaloqatigiinnerit pissappata ingerlanneqarsinnaasut, Múte B. Egede Facebookikkut ilaatigut allappoq.
USA-p præsidentiata illorsuata oqaaseqartitaata Brian Hughesip nutaarsiassaqartitsivimmut Reutersimut oqarnera naapertorlugu Kalaallit Nunaannut tikeraarneq USA-p Kalaallit Nunaatalu assigiinngitsutigut suleqatigiissinnaanerannut periarfissiissasoq, Kalaallit Nunaatalu namminersortuunera ataqqineqartoq aamma oqaatigalugu.
- Kalaallit Nunaat, kulturiat, oqaluttuaat, inui qimussersuarlu USA-p aningaasaliiffigisaa pillugit tikeraarneq ilisimasaqarnerulernissamut pissuteqarpoq, Brian Hughes oqarpoq.
