Amerikamiut timmisartui Herculesit Nuummi mittarfimmut tikittut
Timmisartoq politiinik 60-it missaannik politiillu qimmiinik pingasunik ilaasoqartoq akunnialuit matuma siorna tikippoq.
Maannalu amerikamiut timmisartui Herculesit marluk tikipput.
Amerikamiut præsidentiata tullersortaata nuliata nunatsinnut sisamanngornermit arfininngornermut tikeraarnissaa pissutigalugu politiit 60-it missaanniittut nunatsinnukarput.
Herculesini maanna tikeqqammerluinnartuni kikkut ilaanersut suli ilisimaneqanngilaq, KNR-illi pisoq qanimut malinnaavigaa.
Nalunaaqutaq 18.52 nutarterneqarpoq.
Timmisartumut ilaasut atorfiliorpasittut KNR-imit tusagassiortup mittarfimmiittut oqaatigaa, kisianni timmisartumi Herculesinut ilaasut inuinnaanngillat. Amerikamiummi namminneq biilitik aamma nassarpaat.
Mittarfimmiittullu maanna inuppassuupput, tikittulli arlaannaalluunniit oqaaseqarumanngilaq, kisianni ikiuukkiortorlutik maanngarlutik KNR-imut oqaatigaat.
Amerikamiut biilinik katillugit sisamanik nassataqarput.
