- USA suleqatigisatsinni qaninnerpaavoq. Europami atlantikorlu illugiillugu ataatsimoorpugut. Taamaammat Kalaallit Nunaannut soqutiginnittoqaleriartornera pitsaasuuvoq.

Ministeriunerup Mette Frederiksen (Socialdemokratiet) naalakkersuisut siulittaasuat, Múte B. Egede (IA) peqatigalugu Ministeriuneqarfiup allattoqarfiani tusagassiortunik katersortitsineranni taama oqarpoq.

Tamanna ulluni ulapaarfiungaatsiartuni, USA-p præsidentissaata Donald Trumpip malunnaateqangaatsiartunik oqaaseqarnerata kingorna ingerlanneqarpoq.

Mette Frederiksenilli Kalaallit nunaata naalagaaffiunissaanut apeqqut Kalaallit nunaanni akineqassasoq oqaatigaa.

- Naalagaaffiunermut apeqqummut tunngatillugu aalajangiineq taanna Nuummi aallartillunilu naammassineqassaaq. Kalaallit Nunaat kalaallit pigaat. Siunissatsinnik nammineq aalajangiissaagut. Naalagaaffinngornissamut kissaateqartoqangaatsiartoq malugisinnaavara.

Múte B. Egedellu taama oqarneranik taperserpaa.

- Naalagaaffinngornissamut ilungersuuteqarneq nutaajunngilaq.

- Kalaallit Nunaat kalaallit pigaat, Qallunaajorusunngilagut, amerikamioorusunngilagut kalaaliorusuppugut, taanna oqarpoq.

Piumasaqaatigut

Múte B. Egedep USA-mik suleqateqarneq pingaartuunerarpaa, suleqateqartoqaannassaarlu.

- Piumasaqaatigulli malillugit ingerlanneqassaaq. Suleqatigiinneq tassaassaaq oqaloqatigiinneq, suleqatigiinnq iluarsiissutissanillu ujartuineq. Ikinngutigiit oqaloqatigiinnissaat pingaaruteqarpoq.

Kalaallillu amerikamioorusunngitsut oqaatigeqqippaa.

- Kissaaterput tassaavoq, aningaasaqarnikkut siuariarnissarput nammineernerulernissarpullu, taanna oqarpoq.

Naalagaaffeqatigiinneq killiffimmiiginnarsinnaanngitsoq

Ullut kingullit eqqarsaatigalugit, naalagaaffeqatigiinneq Múte B. Egedep qanoq isigineraa KNR-mit aperineqarpoq.

- Ullumikkumut piffissamilu kingullermi killiffigisaq periarfissaanngilaq. Tamanna arlaleriarluta erseqqissaatigaarput. Nutaamik ingerlaqqittariaqarpugut.

Mette Frederiksenip Danmarkip Kalaallit Nunaatalu akornanni ukiuni kingullerni suleqatigiilluartoqartoq oqaatigaa, taamaammallu maannakkut unammillernartut ataatsimut suleqatigiissutiginissaat ajornaanneruvoq.

- Nunanut allanut politikkikkut periarfissaqarnerunissaq, Kalaallit Nunaatnnut Savalimmiunullu inituvoq.

- Aaqqiinerit siusinnerusumi pitsaasuusimasut, maannakkut pitsaasuusariaqanngillat, taanna oqarpoq.

Taamaammat Savalimmiut Danmark peqatiginagu WHO-mut tamakkiisumik ilaasortanngorsinnaanersoq misissorneqaleruttorpoq.

Naalagaaffeqatigiinneq ingerlatiinnarneqarsinnaava?

Mette Frederiksenip naalagaaffeqatigiittoqaannarnissaa kissaatigalugu erseqqissaatigaa, nangillunilu:

- Naalagaaffeqatigiinneq atorunnaarsinnagu ineriartortissavarput.

Taassuma naalagaaffeqatigiinnermi periarfissarpassuit erseqqissaatigaa. Assersuutigalugu ilinniartitaaneq, peqqinnissaqarneq ilaqutariinnermullu tunngasut.

Múte B. Egede Kalaallit Nunaat qanorluunniit akiliuteqaraluarluni naalagaaffinngorusunnersoq aperineqarpoq.

- Kalaallit inuit Danmark qanoq suleqatigerusunnerlugu aalajangigassaraat.