Naalakkersuisut siulittaasuat Múte B. Egede USA-mi nutaarsiassaqartitsivimmit Fox Newsimit ippassaq unnukkut apersorneqarpoq.

Fox News USA-mi talerperlerliit nutaarsiassaqartitiviattut ilisimaneqarpoq.

Kalaallit Nunaata soqutigineqaleraluttuinnarnera ilutigalugu Fox Newsip naalakkersuisut siulittaasuat apersorpaa.

Múte B. Egedellu USA-mi innuttaasunut qanoq oqarnissani piareersimagaa tassani ersarippoq.

Naallu apersuisoq apeqqutinik assigiinngilluinnartunik qulingiluanik apeqquteqaraluartoq naalakkersuisut siulittaasuata eqqartugassat marluk uteqattaarpai.

USA-p isumannaatsuuppat Kalaallit Nunaat isumannaatsuussasoq, USA-llu Kalaallit Nunaatalu suleqatigiinnerisa nukittorsarneqarnissaa Múte B. Egedep pingaaruteqartippaa.

Qallunaajorusunngitsugut amerikamioorusunngitsugullu kalaaliorusuttugulli sisamariarluni uteqqippaa.

Sakkutuulersornerunissaq ukkatarineqartoq

USA-p Kalaallit Nunaanni sakkutuuliinerata annertusarneqarsinnaanissaa naalakkersuisut takorloorneraat apeqqutigineqarmat tamanna immikkut maluginiagassaavoq.

- Nunani tamalaani pisut eqqarsaatigalugit Issittup illersorneqarnissaa pingaaruteqarneruleriartortoq ilisimavarput. Nunarput, nunarsi, Issittoq, Amerikami nunat, nunallu killiit qanoq illersorneqassanersut oqallisigineqarnissaannut ammavugut, Múte B. Egede oqarpoq.

KIna itigartinneqartoq

Illersornissaqarfik eqqartorneqareermat nunatsinni aatsitassarsiorneq eqqartorneqalerpoq.

Kinamiut suliffeqarfii Kalallit Nunaanni sulippat?

- Massakkuunngitsoq. Suliffeqarfik ataaseq akuersissuteqarunarpoq, akuersissutilli allat Kinamiunut tunniunneqarnissaat ukiut marluk matuma siornatigut itigartippagut. Aatsitassarsiornermili USA-mit EU-miillu aningaasaliisoqarnerusoqarnissaa Kalaallit Nunaata kissaatigaa, assigiinngitsutigut aningaasarsiorsinnaanissarput qulakkerumallugu, aningaasarsiornerlu nunatsinni annertusarniarlugu.

- Neqeroorutigisinnaasagut suleqatigiissutigisinnaasagullu amerlaqaat, taamaammat USA-p nunatsinni aatsitassanik qalluinissamut aningaasaleeqataanissaanut piareeqqavugut, naalakkersuisut siulittaasuat oqarpoq.