Múte B. Egede: USA-p suleqatiginerulernissaanut piareersimavugut

- Qinersinermut allamulluunniit tunngassuteqarnavianngilaq, Múte B. Egede tusagassiortunik katersortitsinermi aallarteqqammerluinnartumi oqarpoq.

Nunatta nunarsuup ilaani kikkunnit tamanit oqaluuserineqarnerata kingunerisaanik tusagassiortunik katersortitsineq ”ulluni makkunani pisunut” tunngassuteqarpoq.

Múte B. Egede ministeriuneq Mette Frederiksen peqatigalugu ministeriuneqarfimmi tallimanngormat tusagassiortunik katersortitsipput. Naalakkersuisut siulittaasuat Danmarkimiit tikeqqammerpoq, tusagassiortunillu katersortitsinermi uani Múte B. Egedep kalaallinut oqaaseqarnerani siulliuvoq.

Taassuma Inatsisartuni partiit siulittaasui tamarmik aqagu katersorniarlugit oqaatigaa.

- Inuiattut ataatsimoornissaq aatsaat taama pingaartigilerpoq, naalakkersuisut siulittaasuat oqarpoq.

MAGA sakkutuulersornissamillu aarlerisaarineq

Trump Junior Nuummut sapaatip akunnerata missaata matuma siorna tikeraarpoq, teqqianillu MAGA-mik allanneqartunik agguaassillunilu inoqutinut attaveqaatimi imassaanik suliaqarpoq, Trump Seniorilu Floridami tusagassiortunik katersortitsivoq, taassumalu Kalaallit Nunaannik aqutsilernissaminut sakkutuunik aningaasaqarnikkulluunniit pillaatimik atuisinnaanissamut periarfissaqarnera oqaatigaa.

Præsidentinngortussamulli tullersortaasussap, J.D. Vancep "sakkutuulersornermik atuinissaq pisariaqanngitsoq" kingusinnerusukkut oqaatigaa.

Múte B. Egedep Trumpip oqaaseqaatigisai ernumanartutut oqaatigai. Taassumali nunarput tuniniagaanngitsoq aamma kalaallit nunatta siunissaanik aalajangiisussaasut erseqqissaatigaa.

- Sakkutooqarnikkut aaqqiagiinngittoqalinnginnissaa pingaaruteqarpoq. Aallaqqaammut tusarneqarnera uivernarpoq. Kisianni præsidentinngortussap tullersortissaata sakkutooqarnermik atuinissaq eqqarsaatigineqanngitsoq ippassaq oqaatigaa.

- Donald Trump oqaloqatigalugu aallartipparput, suleqatigiinnissamullu periarfissarsiorluta, Múte B. Egede oqarpoq.

Taassumalu nunatta USA suleqatigerusukkaa uteqattaarpaa. Nunattalu USA-mik suleqatiginninnermik annersusiinissaq piareersimaffigaa.

- Aatsitassarsiornermut tunngatillugu matunik ammatitsivugut. Ukiunilu aggersuni taamaaginnassaagut. USA niueqatigisariaqarparput.

Angajoqqaanik misissuutit isornartorsiorneqartut

Aningaasaqarnermut naalakkersuisup aamma Siumumi siulittaasup Erik Jensenip Trump nunatsinnut tikilluaqqulluinnarlugu juullinngitsiartoq oqaatigaa. Taamaammat Múte B. Egedep Trumpip soqutiginninneq maanna qanoq igineraa tusagassiortup aperaa.

- Nunat allat nunatsinnut tusarnaaleqqapput. Oqaaseqaatit aalassatsitsisinnaapput, uagut suliat taamaatsillugit nassuiartassavagut ataatsimoorlutalu, naalakkersuisut siulittaasuat oqarpoq.

Taassuma ”suliat” suut pineqarnersoq toqqaannartumik oqaatiginngilai, kisianni angajoqqaanut misissuutit oqaluuserineqangaatsiartut ilaattut taavai. Isumaginninnermummi Ineqarnermullu ministereqarfiup danskit naalakkersuisuisa nunatsinnilu naalakkersuisut meeqqanik inissiisarnermi suliani ”tarnikkut misissuutit” oqaluuserineqangaatsiartut atorneqartarnerannut ataatasimut aaqqiissutissaq isumaqatigiissutigisimagaat ippassaq nalunaarutigaa.

Misissuutit kalaallit kulturiannut oqaasiinullu naleqqussagaanngitsutut isornartorsiorneqarsimapput. Isornartorsiuisut taakku kukkusumik inissiisoqarneranik kinguneqarsinnaasoraat. Ataatsimut aaqqiissut qanoq ilaqarnersoq suli saqqummiunneqanngilaq.