Partiit siulittaasui Trumpimut: "Pissusilersuutit akuersaarneqarsinnaanngilaq"
Kalaallit partiivisa siulittaasui præsidentip Trumpip nunatsinnik aqutsilerniarluni oqalunnera naammatsiffigaat.
Taakku tusagassiuutinut nalunaarummi ataatsimut ima allapput:
”Uagut - Partiit siulittaasui - Kalaallit Nunaanik tiguaaniarnermik aammalu aqutsiniarnermik siunertaqarnermik oqaaseqartoqarnera akuerinngilarput. Partiini siulittaasutut akuerinngilarput nunat ikinngutigiit aammalu illersornissakkut ataatsimooqatigiit akornanni taamatut pissuseqartoqarnera.
Kalaallit Nunaani politikkikkut partiini siuttuttut erseqqissaatigissavarput Kalaallit Nunaata maannamut nunat tamat akornani suleriaatsit malillugit suliani nangillugit ingerlatiinnarmagit tassanilu nunat tamat akornani inatsisit isumaqatigiissutillu malillugit ingerlatsisoqarluni.
Kalaallit Nunaani partiit tamarmik tamanna ataatsimoorfigaarput aammalu avissaartuutsitsiniaanermik nipeqartitsineq sakkortuumik akerlilerparput akuersaarnagulu. Kalaallit Nunaat ataasiuvoq ataatsimoorfiusoq”, tassani allassimavoq.
Naammaleqaaq
Tusagassiuutinut nalunaarut Demokraatinit, Jens-Frederik Nielsenimit, Naleqqamit Pele Borbergimit, Inuit Ataqatigiinnit Múte B. Egedemit, Siumumit Vivian Motzfeldtimit Atassummiillu Aqqalu C. Jeremiassenimit atsiorneqarpoq.
Partiit siuttui amerikamiut præsidentianut qanoq ersarissaasinnaanertik pillugu ullumi ataatsimiipput. Trumpimmi nunatsinnik aqutsilerusunnini - aammaarluni - ippassaq oqaatigaa. Taannalu "naalagaaffimminut ilanngutitsisinnaanermut" tunngatillugu tusagassiortunik katersortitsinermi aperineqarami, ima akissuteqarpoq:
- Taamaattoqarnissaa ilimagaara.
Nunamik tiguaaneq nammineq naalagaaffimminut ilanngutititsinermik isumaqarpoq.
Tamanna pissutigalugu ´Múte B. Egedep (IA) partiit siuttui tamarmik ullumi aggersarpai. Taannami naalakkersuisuni suli siulittaasuugallarpoq, taassumalu Trumpip oqaaseqarnera ippassaq naammatsiffigaa.
- Ataqqinninngitsumik pissusilersorfigineqaannassanngilagut. Tassa naammaqaaq, taanna Facebookikkut allappoq.
Nuummi aqagu akerliussutsimik takutitsisoqarniarpoq, tassanilu "naammaleqaaq" qulequtarineqarpoq.
Trumpip nunatsinnut tunngatillugu ammasumik iluareqqusaarnera siulliunngilaq, kalaallillu politikeriisa "Kalaallit Nunaat uagut pigigipput. Amerikamiorsunngitsugut aamma danskiorusunngitsugut. Kalaaliusugullu" aatsaat siullermeerlutik akissutiginngilaat.
Kisianni politikikkut siuttut USA qasukkaqqullugu aatsaat siullermeertumik ataatsimoorlutik Washingtonimut allagaqarput.
"Pisuunngortissavassi"
Donald Trumpip nunatsinnik piserusunnini siullermerpaamik 2019-imi oqaatigaa. Taassumalu amerikamiut qeqertarujussuarmik piginnilernissaanut eqqarsaatini siorna decembarimi oqaatigeqqippai.
Tamanna Issittup eqqaani sillimaniarnermi politikkikkut pissutsinik nakkutiginninnerulernissamik kinguneqassaaq.
Trumpip, USA-mi præsidentitut aappassaanik januaarimi ivertinneqartup tamanna sukannernerulerfigaa, USA-llu nunatsinnik aqutsilernissaanut sakkutuunik atuisinnaanini mattutinnginnerarpaa.
Taanna Kongressimi marsip aallartinnerani oqalugiarnermini oqarpoq:
- Isumaqarpunga (Kalaallit Nunaat aaqq.) pigilerumaaripput. Arlaatigut iliuuseqarnikkut.
Ataatsimiittarfimmi taama oqaaseqarnerani illartoqarpoq, Trumpillu nunatsinnik aqutsilernissaminut kissaateqarnini pisortatigoortumik tassani siullermeertumik oqaatigaa.
Taannalu oqalugiarnermini allami sapaatip akunnerata siuliani ima oqaaseqarluni:
- Siunissarsi pillugu nammineq aalajangeerusunnersi ataqqivarput. Taamaaliorusukkussilu USA-mut ilanngunnissamut tikilluaqquassi.
- Paarissavassi, atugartuunngussaasi, suleqatigiillutalu Kalaallit Nunaat aatsaat taama nukittutigilersissavarput, præsidenti oqarpoq.
