Donald Trump USA-mi præsidentitut ukioq manna januaarip ulluisa 20-anni ivertinneqaramili taanna Kalaallit Nunaat pillugu arlaleriarluni oqaaseqareerpoq.

Kalaallit Nunaannut milliardilikkuutaanik aningaasaleerusunnini, kalaallillu pisoorsuanngortinniarlugit, Trumpip inoqatinut nammineq attaveqaqatigiittarfimmini Truth Socialimi ataasinngornermut unnuaani ilaatigut allaaseraa.

Nunatsinnilu partiit siulittaasui KNR TV-kkut toqqaannartumik ippassaq unnukkut aallakaatinneqartumi oqallitsinneqarmata ima aperineqarput:

USA-p præsidentia Donald Trump tatiginarpa?

Partiillu siulittaasuisa akornanni ataasiinnaq, tassa Qullermi siulittaasoq Karl Ingemann apeqqummut anngaavoq.

- USA-mi inuit 340 millioniusut siuttussatut nammineq toqqagaat tatiginanngissinnaanngilaq. Tatigigamikku aatsaat taamatut qinerpaat, Karl Ingemann oqarpoq.

Partiit siulittaasui naggataarutaasumik oqallitsinneqareermata Karl Ingemann DR-imit apersorneqarluni itisiliivoq, Kalaallit Nunaat Trumpip qinigaaffia qaangerlugu siumut isigisariaqaripput oqaatigalugu.

- Trump ukiuni sisamani præsidentiusussaavoq. Tamannalu qaangiutereerpat takorloorsinnaavara USA suleqatigilersinnaallugu. USA-mi ukiorpassuit suleqatigierreerparput, taanna oqarpoq.

Partiit tallimat Trump tatiginngilaat

USA-p præsidentia Trump tatigineqarsinnaanngitsoq partiit tallimat allat siulittaasuisa oqaatigaat.

USA-p præsidentia nunatsinnik ataqqinninnani pissusilersortoq naalakkersuisut siulittaasorigallagaata Múte B. Egedep, Inuit Ataqatigiinneersup, oqallitsitsinermi oqaatigeqqippaa, kalaallillu nammineq siunissartik aalajangiiffigigumaaraat oqaatigalugu.

Siumup sulittaasua Erik Jensen isumaqarpoq Trumpip Kalaallit Nunaanni innuttaasut sunnerniarsarigai. USA-lli suleqatigineqartariaqarnera aamma miserratiginngilaa.

- Tatigineqarsinnaanngilarli ataqqinninnanilu, Erik Jensen TV-kkut oqallitsitsinermi oqarpoq.

Atassutip siulittaasua Aqqalu C. Jeremiassen, USA-mi republikanerik maannamut tapersersuisuugaluarpoq, Trumpilli oqaasii aallaavigalugit tapersersorunnaarsimallugit.

- Republikanerit tassunga killissimanerat ajuusaarnarpoq, nunarput pillug oqaasii allaallumi nunatta qanoq ateqalernissaanik oqaaseqartut.

Trump tatigineqarsinnaanersoq apeqqutigineqarmat Naleqqap siulittaasua Pele Broberg naaggaarpoq:

- USA-p pissaaneqarnera avaqqunneqarsinnaanngitsoq tamatta nassuerutigisariaqarparput, taanna oqarpoq.

Donald Trumpip nunatsinnik aqutserusunnerata Kalaallit Nunaannit Danmarkimiillu ataatsimoorullugu sakkortuumik oqaaseqarfigineqarsimannginnera Demokraatit siulittaasuata Jens-Frederik Nielsenip ajuusaarutigaa:

- Nunarput illuunngilaq pisarineqarsinnaasoq. Donald Trumpip oqariartaasia malillugu malugisinnaavarput aamma peqqarniinnerusumik pisariaqaripput, taanna oqarpoq.